سونىمەن قاتار جولاۋشىلارعا «اۋىزاشار قورجىندارى»، الەۋمەتتىك از قامتىلعان وتباسىلارعا «رامازان قورجىندارى» تاراتىلۋدا.
قمدب بەكىتكەن جۇمىستىڭ نەگىزگى ءبىر باعىتى رەتىندە رامازان ايىندا «اۋىزاشار» اكسياسى ۇيىمداستىرىلىپ كەلەدى، دەپ حابارلايدى Almaty-akshamy.kz ءدىني باسقارمانىڭ باسپا ءسوز قىزمەتىنە سىلتەمە جاساپ.
اتالمىش اكسيا اياسىندا «ۋاقىپ» قورى مەن «زەكەت جانە قايىرىمدىلىق» قورى، سونداي-اق، قمدب-عا قاراستى «قايىرىمدىلىق مەكەمەلەردىڭ» ۇيىمداستىرۋىمەن مەشىت جاماعاتىنا، مەدرەسە، قايىرىمدىلىق مەكەمەلەردىڭ شاكىرتتەرىنە، ستۋدەنتتەرگە، قازىنالى قارتتارعا، كوپبالالى وتباسىلارعا، مۇمكىندىگى شەكتەۋلى جاندارعا اۋىزاشار بەرىلۋدە. سونىمەن قاتار، رەسپۋبليكا بويىنشا وكىلدىكتەردىڭ ۇيىمداستىرۋىمەن جولاۋشىلارعا «اۋىزاشار قورجىندارى»، الەۋمەتتىك از قامتىلعان وتباسىلارعا «رامازان قورجىندارى» تاراتىلۋدا.
رامازان ايىنىڭ العاشقى 10 كۇنىندە 216 764 ادامعا بەرىلگەن بولسا، ورتاڭعى 10 كۇنىندە 342 309 مىڭ ادامعا، ال جالپى 20 كۇن ىشىندە 559 073 ادامعا اۋىزاشار بەرىلدى.
«اللا ەلشىسى (اللانىڭ سالاۋاتى مەن سالەمى بولسىن): «ورازا ۇستاۋشىنى تاماقتاندىرعان ورازا ۇستاعاننىڭ ساۋابىن الادى. ءارi ورازا ۇستاۋشىنىڭ ساۋابى كەمiتiلمەيدi» دەيدى. اللا تاعالا پايعامبار وسيەتىنە امال ەتىپ، اۋىزاشار ۇيىمداستىرعان، وعان ۇلەس قوسقان ءاربىر جومارت جانعا اللا ەلشىسى سۇيىنشىلەگەندەي ورازا تۇتۋشىنىڭ ساۋابىن، ءناسىپ ەتسىن!» - دەپ جازدى ءدىني باسقارمانىڭ سايتى.