كۇدىكتىدەن قازاقستان اۋماعىندا تىيىم سالىنعان ءدىني كىتاپتار مەن ديسكىلەر تاركىلەندى
اتىراۋلىق پوليسەيلەر 20 جىلدان بەرى حالىقارالىق ىزدەۋدە جۇرگەن كۇدىكتىنى ۇستادى، دەپ حابارلايدى Almaty-akshamy.kz پوليسياعا سىلتەمە جاساپ.
20 ءساۋىر كۇنى اتىراۋ وبلىسى پوليسيا دەپارتامەنتىنىڭ ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى جەدەل ىزدەستىرۋ بارىسىندا حالىقارالىق ىزدەۋدە جۇرگەن 1975 جىلى تۋعان وزبەكستان رەسپۋبليكاسىنىڭ ازاماتىن انىقتاپ، ۇستادى.
تەكسەرۋ بارىسىندا شەتەلدىك ازامات وزبەكستان رەسپۋبليكاسى قىلمىستىق كودەكسىنىڭ 97-بابىنىڭ 2-بولىگى جانە 248-بابى 2-بولىگىنە نەگىزدەلگەن قىلمىستىق قۇقىقبۇزۋشىلىق، ياعني قاساقانا ادام ءولتىرۋ جانە زاڭسىز قارۋ ساقتاۋ بويىنشا حالىقارالىق ىزدەستىرۋ جاريالانعانى انىقتالدى.
1975 جىلى تۋعان شەتەل ازاماتىنىڭ ۋاقىتشا تۇراتىن جەرىن ءتىنتۋ بارىسىندا قازاقستان اۋماعىندا تىيىم سالىنعان ءدىني كىتاپتار مەن ديسكىلەر تاركىلەندى. اتالعان فاكتى بويىنشا كۇدىكتى ۇستالىپ، ق ر قپك-نىڭ 128-بابىنا سايكەس قاماۋعا الىندى.