2025 جىلى Enbek.kz ەلەكتروندى ەڭبەك بيرجاسىندا ەڭ جوعارى جالاقى ۇسىنىلاتىن جانە ەڭ تومەن اقى تولەنەتىن ماماندىقتار بەلگىلى بولدى، دەپ حابارلايدى aqshamnews.kz
جىل ىشىندە ەڭ كوپ سۇرانىسقا يە ماماندىقتار قاتارىندا مەيىرگەرلەر، تاربيەشىلەر، جۇرگىزۋشىلەر مەن سانيتارلار بولدى. الايدا بۇل سالالارداعى ۇسىنىلاتىن جالاقى دەڭگەيى تومەن بولىپ قالدى. اتاپ ايتقاندا، مەيىرگەرلەرگە 143–178 مىڭ تەڭگە، تاربيەشىلەرگە 139–182 مىڭ تەڭگە، اۆتوكولىك جۇرگىزۋشىلەرىنە 151–195 مىڭ تەڭگە، ال سانيتارلارعا 110–133 مىڭ تەڭگە ايلىق ۇسىنىلعان.
سونىمەن قاتار جۇمىس ىزدەۋشىلەردىڭ جالاقىعا دەگەن كۇتىمى بۇدان الدەقايدا جوعارى ەكەنى بايقالادى. مىسالى، بۋحگالتەرلەر ورتا ەسەپپەن 308 مىڭ تەڭگە، زاڭگەرلەر 294 مىڭ تەڭگە، جۇرگىزۋشىلەر 250 مىڭ تەڭگە، ال تاربيەشىلەر 199 مىڭ تەڭگە جالاقى سۇراعان.
2025 جىلى جۇمىس بەرۋشىلەر ەڭ جوعارى جالاقىنى فلوتتاعى شتۋرمان ماماندىعىنا ۇسىنعان. بۇل لاۋازىم بويىنشا ايلىق 875–900 مىڭ تەڭگە ارالىعىندا كورسەتىلگەن. سونداي-اق تاۋ-كەن ونەركاسىبىندە ۋچاسكە باستىعىنىڭ ورىنباسارلارىنا 714 مىڭ تەڭگەدەن جوعارى، ال بۇرعىلاۋ قوندىرعىلارىنىڭ ماشينيستەرىنە 700 مىڭ تەڭگەدەن باستاپ جالاقى ۇسىنىلعان.
ال تۇيىندەمەلەردە كورسەتىلگەن ەڭ جوعارى كۇتىلەتىن ايلىق پيلوتتاردا تىركەلگەن 1،9 ملن تەڭگە. بۇدان بولەك، تاۋ-كەن سالاسىنداعى باسشىلاردىڭ ورىنباسارلارى 1،2 ملن تەڭگە، كەمە كاپيتاندارى 1،1 ملن تەڭگە جالاقى كورسەتكەن.
جالپى العاندا، 2025 جىلى Enbek.kz پورتالىندا 1،3 ميلليوننان استام بوس جۇمىس ورنى جاريالانعانىمەن، ۇسىنىلاتىن جالاقى مەن ۇمىتكەرلەر كۇتكەن تابىس اراسىندا ايقىن الشاقتىق ساقتالعان.