الماتىدا مينيمالدى ءينۆازيۆتى كارديوحيرۋرگيا (MICS) ورتالىعى مەن اورتا پاتولوگياسى ورتالىعى اشىلدى

الماتى قالالىق كارديولوگيالىق ورتالىعىنىڭ كارديوحيرۋرگيا بولىمشەسى بازاسىندا شۇعىل جانە جوسپارلى پاسيەنتتەرگە كومەك كورسەتەتىن مينيمالدى ءينۆازيۆتى كارديوحيرۋرگيا (MICS) ورتالىعى مەن اورتا پاتولوگياسى ورتالىعى اشىلدى. بۇل تۋرالى ورتالىق ديرەكتورى ەرماعامبەت قۋاتبايەۆ الماتى قالاسى قوعامدىق دەنساۋلىق ساقتاۋ باسقارماسىنىڭ (قدسب) باسشىسى مارات پاشيموۆپەن وتكەن ەسەپتىك كەزدەسۋدە مالىمدەدى.

مينيمالدى ءينۆازيۆتى كارديوحيرۋرگيانىڭ باستى ەرەكشەلىگى - كەۋدە قۋىسىنا جاسالاتىن ءداستۇرلى كولەمدى تىلىكتەن باس تارتۋ. وتا كەۋدە سۇيەگىن كەسپەي، ءبۇيىر جاقتان شاعىن تىلىك ارقىلى جاسالادى. بۇل حيرۋرگيالىق جاراقاتتى ازايتىپ، اسقىنۋ ءقاۋپىن تومەندەتەدى ءارى پاسيەنتتەردىڭ تەزىرەك ساۋىعىپ كەتۋىنە مۇمكىندىك بەرەدى. ءقازىر كارديوحيرۋرگيالىق وتانىڭ جالپى كولەمىنىڭ شامامەن 4 پايىزى وسىنداي وتا.

MICS باعىتىن دامىتۋ زاماناۋي وتانىڭ ۇلەسىن ارتتىرىپ، پاسيەنتتەردىڭ وزىق تەحنولوگياعا قولجەتىمدىگىن كەڭەيتۋگە، سونداي-اق، اسىرەسە ەڭبەككە قابىلەتتى جاستاعى ادامدار ءۇشىن ستاسيوناردا جاتۋ جانە وڭالتۋ مەرزىمىن قىسقارتۋعا مۇمكىندىك بەرەدى.

جۇمىستىڭ جەكە ءبىر باعىتى - اورتا پاتولوگياسى ورتالىعى. اورتانىڭ پاتولوگياسى كۇردەلىلىكتىڭ 7-ساناتىنا جاتادى جانە كارديوحيرۋرگياداعى ەڭ اۋىر، ومىرگە اسا ءقاۋىپتى جاعدايدىڭ ءبىرى سانالادى. مۇنداي كەزدە ءار مينۋت قىمبات، ال دياگنوز قويۋ مەن شەشىم قابىلداۋ جىلدامدىعى اۋرۋدىڭ ناتيجەسىنە تىكەلەي اسەر ەتەدى. ستاتيستيكاعا سايكەس، اورتانىڭ جەدەل پاتولوگياسى بار ءاربىر ءۇشىنشى ناۋقاس كوز جۇمادى، ال پاسيەنتتەردىڭ 70%-عا جۋىعى - جاس ءارى ەڭبەككە قابىلەتتى ادامدار.

مامانداندىرىلعان ورتالىقتىڭ قۇرىلۋى قالاداعى مەديسينالىق ۇيىمدارمەن ءوزارا ءىس-قيمىلدىڭ ءبىرىڭعاي الگوريتمىن ەنگىزۋگە مۇمكىندىك بەرەدى. بۇل العاشقى جۇگىنۋدەن باستاپ جوعارى تەحنولوگيالىق مەديسينالىق كومەك كورسەتىلگەنگە دەيىنگى ۋاقىتتى ەداۋىر قىسقارتادى. وسىنداي الگوريتمدى جەتىلدىرۋ كوپتەگەن ادامنىڭ ءومىرىن ساقتاپ، اسا اۋىر جۇرەك-قانتامىر اۋرۋى كەزىندەگى ءومىر ءسۇرۋ كورسەتكىشىن ارتتىرۋعا جول اشادى.

جىل سايىن الماتى قالالىق كارديولوگيالىق ورتالىعىندا 38 مىڭنان استام پاسيەنت مەديسينالىق كومەك الادى، سونىڭ ىشىندە 11 مىڭعا جۋىعى ستاسيونارلىق ەم قابىلدايدى.

وتكەن جىلى ورتالىقتا قالالىق دەڭگەيدە بۇرىن قولجەتىمسىز بولعان جوعارى تەحنولوگيالىق ەمدەۋ ادىستەرى ەنگىزىلدى. اتاپ ايتقاندا، LVAD يمپلانتاسياسى، جۇرەك ترانسپلانتاسياسى، Beating Heart ادىسىمەن قاقپاقشالاردى پلاستيكالاۋ جانە ينتراوتالىق كريوابلياسيا قولدانا وتىرىپ قاقپاقشالاردى پروتەزدەۋ جۇزەگە اسىرىلدى.

ينتەرۆەنسيالىق كارديولوگيا قارقىندى دامىپ كەلەدى: MitraClip، قانتامىرىشىلىك ليتوتريپسيا (IVL)، ەندوميوكاردتىق بيوپسيا جانە قانتامىرىشىلىك ۋلترادىبىستىق زەرتتەۋ (IVUS) ەنگىزىلدى. ال اريتمولوگيا قىزمەتىندە كۇردەلى وتالار يگەرىلدى، سونىڭ ىشىندە يشەميالىق قارىنشالىق تاحيكاردياعا راديوجيىلىكتى ابلاسيا (الماتىدا العاش رەت) جانە سول جاق جۇرەكشەنىڭ قۇلاقشاسىنا وككليۋدەر يمپلانتاسيالاۋ بار.

بىلتىر قاراشا ايىنان باستاپ ورتالىقتا ناۋقاسقا باعدارلانعان ءتاسىل ەنگىزىلدى: اۋرۋحانادان شىققاننان كەيىن بارلىق پاسيەنتتىڭ جاعدايىن، تاعايىندالعان ەمگە بەيىلدىگىن باقىلاۋ جانە اسقىنۋدى ەرتە انىقتاۋ ماقساتىندا «قامقورلىق ءبولىمى» قىزمەتكەرلەرى باقىلاۋ تەلەفون قوڭىراۋىن جۇزەگە اسىرادى.

جوعارى تەحنولوگيالىق وتا كولەمىن كەزەڭ-كەزەڭىمەن كەڭەيتۋ ورتالىقتىڭ كۇردەلى جۇرەك-قانتامىر اۋرۋلارىن دياگنوستيكالاۋ جانە ەمدەۋ مۇمكىندىگىن ەداۋىر ارتتىرىپ وتىر.

ورتالىقتىڭ الداعى جوسپارىندا گيبريدتى روبوتتاندىرىلعان انگيوگرافيالىق اريتمولوگيالىق قوندىرعىنى ەنگىزۋ جانە پايدالانۋ تۇر. بۇل وتانىڭ دالدىگىن ارتتىرىپ، جۇرەك ىرعاعىنىڭ كۇردەلى بۇزىلىسىن ەمدەۋ مۇمكىندىگىن كەڭەيتىپ، پاسيەنتتەردىڭ قاۋىپسىزدىگىن كۇشەيتەدى.

كەزدەسۋ قورىتىندىسى بويىنشا الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ بۇل ناتيجەمەن شەكتەلمەي، يننوۆاسيالىق مەديسينالىق تەحنولوگيانى جۇيەلى تۇردە ەنگىزۋدى، جوعارى تەحنولوگيالىق كومەكتىڭ اياسىن كەڭەيتىپ، ونىڭ حالىق ءۇشىن قولجەتىمدىگن ارتتىرۋدى تاپسىردى.