قازاقستاندا وكق الاڭىندا وتباسى كۇنىن اتاپ ءوتۋدىڭ جاڭا كونسەپسياسىن تانىستىرۋعا ارنالعان بريفينگى ءوتتى. ءىس-شاراعا مادەنيەت جانە اقپارات مينيسترلىگى، ىشكى ىستەر مينيسترلىگى، ەڭبەك جانە الەۋمەتتىك قورعاۋ مينيسترلىگى، وقۋ-اعارتۋ مينيسترلىگى وكىلدەرى، سونداي-اق وتباسىلىق قارىم-قاتىناس سالاسىنداعى ساراپشىلار قاتىستى، دەپ حابارلايدى aqshamnews.kz.
كەزدەسۋدە مەملەكەت باسشىسىنىڭ وتباسى ساياساتى سالاسىنداعى جولداۋىن جۇزەگە اسىرۋ شارالارى، سونداي-اق ۇلتتىق قۇرىلتاي وتىرىسىندا قاسىم-جومارت توقايەۆتىڭ قوعامدا وتباسى قۇندىلىقتارىن ناسيحاتتاۋعا ارنالعان تاپسىرمالارىنىڭ ورىندالۋى تالقىلاندى.
وتباسى كۇنىن اتاپ ءوتۋدىڭ جاڭا كونسەپسياسى وسى مىندەتتەردى شەشۋگە باعىتتالعان. 2-8 قىركۇيەك ارالىعىندا وتباسى كۇنىنە ارنالعان اپتالىق وتەدى. ءار كۇن ارنايى تاقىرىپقا ارنالادى. ونىڭ ىشىندە وتباسىلىق داستۇرلەر، نەكە جوسپارلاۋ، رەپرودۋكتيۆتى دەنساۋلىق، سانالى اتا-انا بولۋ، وتباسىلىق دەمالىس جانە باسقا دا تاقىرىپتار بار. مادەنيەت جانە اقپارات ۆيسە-مينيسترى ەۆگەنيي كوچەتوۆ مۇنداي فورماتتىڭ مەرەكەنى كەڭ اۋقىمدا وتكىزۋگە جانە ونىڭ تيىمدىلىگىن ارتتىرۋعا مۇمكىندىك بەرەتىنىن اتاپ ءوتتى.
«بۇگىنگى تاڭدا وتباسى مەن نەكەنىڭ جاعىمدى ءيميدجىن قالىپتاستىرۋ، وتباسى قۇندىلىقتارىن ناسيحاتتاۋ، اتا-انالاردىڭ بالالاردى تاربيەلەۋدەگى جاۋاپكەرشىلىگىن ارتتىرۋ، بالالارىنىڭ قارت اتا-انالارىنا قامقورلىق جاساۋى – ۇلتتىق ماڭىزى بار مىندەتتەر»، - دەدى ەۆگەنيي كوچەتوۆ.
بريفينگتە وتباسى ساياساتىنىڭ نەگىزگى باعىتتارى، مەملەكەتتىك قولداۋ شارالارى، سونداي-اق «قازاقستاندىق وتباسىلار» ۇلتتىق بايانداماسىندا ۇسىنىلعان الەۋمەتتىك زەرتتەۋلەردىڭ قورىتىندىلارى تۋرالى دا ايتىلدى.
ساۋالناما ناتيجەلەرى بويىنشا رەسپوندەنتتەردىڭ 62،7%-ى وتباسىندا قامقورلىق، ءوزارا قۇرمەت كورسەتۋ جانە قولداۋ ماڭىزدى دەپ سانايدى. ودان كەيىن ورىندا – ماحاببات (43،2%) جانە بالالار (38،7%) ماسەلەسى. سونداي-اق زەرتتەۋ بارىسىندا ەڭبەكقورلىق، ادالدىق جانە ۇلكەندەرگە قۇرمەت كورسەتۋ – ەلىمىزدەگى وسكەلەڭ ۇرپاققا ۇيرەتىلەتىن باستى قۇندىلىقتار ەكەندىگى انىقتالدى.