قارجىلىق مونيتورينگ اگەنتتىگىنىڭ الماتى وبلىسى بويىنشا دەپارتامەنتى قازاقستان، تمد جانە الىس شەت ەل اۋماعىندا جۇمىس ىستەگەن "1WIN" ونلاين-كازينوسىنىڭ زاڭسىز قىزمەتىنە قاتىستى سوتقا دەيىنگى تەرگەۋ جۇرگىزۋدە.
ونلاين-پلاتفورما زاڭسىز ويىن بيزنەسىن ۇيىمداستىرۋمەن قاتار، مىڭداعان وتانداستارىمىزدى تارتىپ، ءتيىستى ليسەنزياسىز بۋكمەكەرلىك قىزمەت كورسەتكەن، دەپ حابارلايدى اlmaty-akshamy.kz zakon.kz-كە سىلتەمە جاساپ.
اقشالاي قاراجات ينتەرنەت-ەكۆايرينگ ارقىلى اۋتەنتيفيكاسياسىز قابىلدانعان، بۇل ءتىپتى كامەلەتكە تولماعاندارعا دا قۇمار ويىندارعا قاتىسۋعا مۇمكىندىك بەردى.
2023 جىلدىڭ وزىندە-اق ونلاين-كازينو اينالىمى شامامەن 4 ملرد تەڭگەنى قۇراعان.
"تەرگەۋ جالعاسۋدا، ونلاين-كازينو سايتى بۇعاتتالدى، ءتورت ۇيىمداستىرۋشىعا حالىقارالىق ىزدەۋ جاريالاندى. تاركىلەنۋگە جاتاتىن مۇلىككە جانە جالپى سوماسى 1،5 ملرد تەڭگە اقشالاي قاراجاتقا تىيىم سالىندى، سونداي-اق "Mercedes-Maybach S500" جانە "Lamborghini Huracan" اۆتوكولىكتەرى تاركىلەندى"، - دەپ جازدى قما باسپا ءسوز قىزمەتى.
ق ر قپك-نىڭ 201-بابىنا سايكەس وزگە دە اقپارات جاريا ەتىلۋگە جاتپايدى.
قارجىلىق مونيتورينگ اگەنتتىگى قازاقستان رەسپۋبليكاسىنىڭ زاڭناماسىنا سايكەس ەلدە ونلاين-كازينو قىزمەتىنە تىيىم سالىنعانىن، ال بۋكمەكەرلىك قىزمەتتەر ءتيىستى ليسەنزيا بولعان جاعدايدا عانا كورسەتىلەتىنىن ەسكەرتەدى.