قازاقستان ازاماتتارىنىڭ شەتەلدە ەڭبەك قۇقىقتارىن قورعايتىن جاڭا كەلىسىمدەرگە باستاماشىلىق ەتۋ ءۇشىن قوسىمشا شارالار قابىلداندى.
بۇل تۋرالى ۇكىمەت وتىرىسىندا كوشى-قون ساياساتى تۇجىرىمداسىن ىسكە اسىرۋ بارىسىن تالقىلاۋ كەزىندە پرەمەر-مينيستردىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«سىرتقى ىستەر مينيسترلىگىنىڭ دەرەكتەرىنە جۇگىنسەك، بيىلعى ءبىرىنشى توقسانداعى ەسەپ بويىنشا قازاقستاننىڭ 194 مىڭنان استام ازاماتى شەتەلدە جۇمىس ىستەپ ءجۇر. ءبىز تۇركيا، بىرىككەن اراب امىرلىكتەرى، ۇلىبريتانيا جانە باسقا دا ەلدەرمەن ونداعى قازاقستان ازاماتتارىنىڭ ەڭبەك قۇقىقتارىن قورعايتىن جاڭا كەلىسىمدەرگە باستاماشىلىق ەتۋ ءۇشىن قوسىمشا شارالار قابىلدادىق»، - دەدى ت. دۇيسەنوۆا.
ونىڭ ايتۋىنشا، ازاماتتارىمىز وڭتۇستىك كورەيادا جۇمىسقا زاڭدى تۇردە ورنالاسۋى ءۇشىن قازاقستاندى «ەڭبەككە رۇقسات بەرۋ جۇيەسىنە» (Employment permit System – EPS) قوسۋ ماسەلەسى پىسىقتالىپ جاتىر.
بۇل رەتتە، migration.enbek.kz سايتىنا تىركەلە وتىرىپ، وسى جۇيە ارقىلى جۇمىسقا ورنالاسۋعا بولادى. ونى ەڭبەك ۇتقىرلىعى ورتالىقتارى جۇزەگە اسىرادى. شەتەلدە جۇمىس ىستەگىسى كەلگەن ادام الدىمەن ءتىل ۇيرەنەدى، مىندەتتى مەديسينالىق تەكسەرۋدەن وتەدى، سوسىن شەتەلگە شىعاتىن قۇجاتتارىن راسىمدەيدى.
بۇدان بۇرىن حابارلانعانداي، قازاقستانعا نەگىزىنەن قاي ەلدىڭ ازاماتتارى قونىس اۋدارىپ جاتقانى انىقتالدى.