تۇركىستان وبلىسىنىڭ سايرام اۋدانىندا 19 جاستاعى قىز كولىكتەن ءولى تابىلدى، - دەپ حابارلايدى اlmaty-akshamy.kz Almaty.tv-گە سىلتەمە جاساپ.
سول سۇراپىل كۇنى قىزدى بولاشاق جارى جۇمىستان الىپ كەتكەن. ولار بيىل ۇيلەنەتىن بولعان. قىزدىڭ دەنەسىن تۋىستارى كورشى اۋىلدان تاۋىپ العان. ولاردىڭ ايتۋىنشا، بۇكىل دەنەسى كوگەرگەن. جابىرلەنۋشىنىڭ ۇستىندەگى كەيبىر كيىمى جوق بولعان.
"ءبىز ونى التى ساعات بويى ىزدەدىك. قوڭىراۋ بارىپ تۇردى، ءبىراق ول تەلەفوندى كوتەرمەدى. ول ۋلانعان دەگەن بولجام بار. ءبىز ءۇش ساراپتاما جاساتتىق. ولاردىڭ ەكەۋىندە ءولىم كومىرقىشقىل گازىنان ۋلانۋ سالدارىنان بولعان. ءۇشىنشى ساراپتاما قالاعا جىبەرىلدى. ناتيجەسى ءبىر اپتادا دايىن بولۋى كەرەك"، – دەيدى مارقۇمنىڭ اكەسى دانيار قۇربانالييەۆ.
"بۇكىل دەنەسى كوگەرگەن. ونىڭ قولى سىنعان، ماڭدايىندا قۇلاعان ءىز بولدى. مۇرنى دا سىنعان. ەرنى جارىلىپ، اۋىزى قانعا تولعان. ونى زورلاماق بولعان"، - دەدى مارقۇمنىڭ تۋىسى مالاحات قۇربانالييەۆا.
وبلىستىق پوليسيا دەپارتامەنتى مالىمەتىنشە، اسا اۋىر قىلمىس جاسادى دەگەن كۇدىكتى ۇستالىپ، ۋاقىتشا ۇستاۋ يزولياتورىنا قامالدى.
"بۇل فاكت بويىنشا قىلمىستىق ءىس قوزعالدى، بارلىق قاجەتتى ساراپتاما تاعايىندالعان. وقيعانىڭ ءمان-جايى انىقتالىپ جاتىر"، - دەپ حابارلادى تۇركىستان وبلىستىق پوليسيا دەپارتامەنتىنىڭ باسپا ءسوز قىزمەتى.