كەشە، 16 قازاندا، "ءحان-تاڭىرى" كومانداسىنىڭ 19 جاستاعى شابۋىلشىسى دياس تولەۋ ماچ ۇستىندە كوز جۇمدى، دەپ حابارلايدى اqshamnews.kz ءتىلشىسى. جاس فۋتبولشىنىڭ قازاسىنا قاتىستى قانداي دەرەكتەر بەلگىلى؟
قايعىلى جاعدايدىڭ ءمان-جايى
وقيعا ءبىرىنشى ليگاداعى «ءحان-تاڭىرى» – «ەكىباستۇز» ماچىنىڭ 64-مينۋتىندا بولدى. دياستىڭ دەنساۋلىعى كەنەت ناشارلاپ، ونى الاڭنان زەمبىلمەن الىپ شىقتى. كوپ ۇزاماي ويىنشىنىڭ قايتىس بولعانى رەسمي تۇردە جاريالاندى. قايعىلى جاعدايدىڭ ناقتى سەبەبى ازىرگە رەسمي اتالعان جوق.
قفف-نىڭ ارەكەتى
قازاقستان فۋتبول فەدەراسياسى جاقىن ۋاقىتتا قۇزىرلى ورگاندارمەن بىرلەسكەن ارنايى كوميسسيا قۇرىلىپ، وقيعا جان-جاقتى تەرگەلەتىنىن مالىمدەدى. قفف باسشىلىعى دا جاعدايدى انىقتاۋ ءۇشىن الماتىعا ۇشىپ كەتتى:
"باس حاتشى داۆيد لوريا جانە كاسىبي كلۋبتار اراسىنداعى جارىستار ديرەكسياسىنىڭ باسشىسى باقىتجان پازىلحاير بارلىق ءمان-جايدى انىقتاۋ ءۇشىن شۇعىل تۇردە الماتىعا ۇشىپ بارادى"، - دەلىنگەن فەدەراسيا حابارلاماسىندا.
دياس تولەۋ - جاس تالانت
قفف مالىمەتىنشە، دياس جاستىعىنا قاراماستان فۋتبولعا دەگەن قۇشتارلىعىمەن جانە دارىنىمەن كوزگە تۇسكەن. ول «قايرات» اكادەمياسىنىڭ تۇلەگى، 2006 جىلى 4 مامىردا تۋعان. 2024 جىلعى ساۋىردە «حان-تاڭىرىنە» اۋىستى. بيىلعى ماۋسىمدا ءبىرىنشى ليگادا 18 ماچقا قاتىسىپ، گول مەن ناتيجەلى پاسپەن ەرەكشەلەنبەگەن. جاسوسپىرىمدەر قۇرامىندا «قايرات» ساپىندا شامامەن 15 ماچ وتكىزىپ، 3 گول سوعىپ، 2 گولدىق پاس بەرگەن.
كلۋبتىڭ مالىمدەمەسى
"قايرات" فۋتبول كلۋبى قايعىلى جاعدايعا قاتىستى جازبا جاريالادى.
"بۇگىن 19 جاسىندا «ءحان-تاڭىرى» ويىنشىسى، «قايرات» فك اكادەمياسىنىڭ تۇلەگى دياس تولەۋ ومىردەن ءوتتى. دياس 2016–2023 جىلدارى ءبىزدىڭ اكادەميادا تاربيەلەنىپ، العاشقى QJ League ماۋسىمىندا «قايرات» U-18 كومانداسىنىڭ ساپىندا چەمپيون اتانعان. ول مەيىرىمدىلىگىمەن، ەڭبەكقورلىعىمەن جانە ماقساتكەرلىگىمەن ەرەكشەلەنىپ، باپكەرلەرى مەن كوماندالاستارىنىڭ قۇرمەتىنە يە بولدى. «قايرات» فۋتبول كلۋبى دياستىڭ تۋعان-تۋىستارى مەن جاقىندارىنا شىن جۇرەكتەن كوڭىل ايتادى. قايعىلارىڭىزعا ورتاقپىز"، - دەلىنگەن كلۋبتىڭ حابارلاماسىندا.