الەمنىڭ 180 ەلىنىڭ مەملەكەتتىك تۋىن جاتقا بىلەتىن ەرگەن دۇيسەنبەك 6 جاستا.
استانا قالاسىنداعى مەكتەپتەردىڭ ءبىرىنىڭ وقۋشىسى ەرگەن دۇيسەنبەك وقۋ-اعارتۋ ءمينيسترى عاني بەيسەمبايەۆپەن كەزدەستى، دەپ حابارلايدى Almaty-akshamy.kz مينيسترلىكتىڭ Telegram-ارناسىنا سىلتەمە جاساپ.
كەزدەسۋگە ەرگەن تۋلار جيناعىن اكەلىپ، ءبىلىمىن كورسەتتى. كىشكەنتاي ءبىلىمپازدىڭ ارمانى وسى ەلدەردىڭ ءبارىن ارالاپ، كوزبەن كورۋ ەكەن.
ەرگەن الەمنىڭ بارلىق مەملەكەتىنىڭ تۋىن بىلگەنمەن، سونىڭ ىشىندەگى ەڭ ادەمىسى ءبىزدىڭ ەلدىڭ تۋى دەپ ەسەپتەيدى.
«مەن ەسەيگەندە اتاقتى ادام بولىپ، كوك بايراعىمىزدى بۇكىل الەمگە تانىتىپ، كوككە كوتەرگىم كەلەدى»، – دەيدى ەرگەن دۇيسەنبەك.
وقۋ-اعارتۋ ءمينيسترى عاني بەيسەمبايەۆ ءبىرىنشى سىنىپ وقۋشىسى ەرگەن دۇيسەنبەكپەن اڭگىمەلەسىپ، وعان گراموتا مەن ەستەلىك سىيلىقتار تابىس ەتتى.
مينيستر ەرگەننىڭ اتا-اناسىنا اقىلدى جانە ءبىلىمدى ۇرپاق تاربيەلەگەندەرى ءۇشىن العىس ايتتى.