18 تامىزدا ۇلتتىق قاۋىپسىزدىك جۇيەسى نەگىزگى كومپونەنتتەرىنىڭ ءبىرى - ق ر قارۋلى كۇشتەرى اۋە قورعانىسى كۇشتەرىنىڭ قۇرىلعانىنا 27 جىل تولىپ وتىر.
بۇگىندە قارۋلى كۇشتەردىڭ بۇل ءتۇرى قازاقستان اسكەرىنىڭ قۋاتتى، جوعارى تەحنولوگيالىق جانە ۇتقىر قۇرامداس بولىگىنە اينالعان، دەپ حابارلايدى aqshamnews.kz.
ولاردىڭ قۇرامىنا اۋە شابۋىلىنا قارسى قورعانىس اسكەرلەرى مەن اسكەري-اۋە كۇشتەرى كىرەدى. ولار اۋە شەبىن سەنىمدى قورعاۋدى، ستراتەگيالىق ماڭىزدى مەملەكەتتىك، اكىمشىلىك جانە اسكەري وبەكتىلەردى بۇركەمەلەۋدى قامتاماسىز ەتەدى. قارۋلى كۇشتەردىڭ باسقا تۇرلەرى مەن اسكەر تەكتەرىن اۆياسيالىق قولداۋ مىندەتتەرىن ورىندايدى.
مامانداردى دايارلاۋ بەيىندى اسكەري وقۋ ورىندارىندا جۇرگىزىلەدى. اقتوبەدەگى اۋە قورعانىسى كۇشتەرىنىڭ اسكەري ينستيتۋتى ۇشۋ جانە ينجەنەرلىك-تەحنيكالىق قۇرامنىڭ ماماندارىن، ال الماتى قالاسىنداعى راديوەلەكترونيكا جانە بايلانىس اسكەري-ينجەنەرلىك ينستيتۋتى اۋە شابۋىلىنا قارسى قورعانىس جانە بايلانىس اسكەرلەرى ءۇشىن ينجەنەرلىك كادرلار دايارلايدى.
اسكەري-اۋە كۇشتەرىندە اەروديناميكالىق، ۇشۋ جانە جاۋىنگەرلىك سيپاتتامالارى بويىنشا الەمدەگى ەڭ جاقسى دەپ تانىلعان زاماناۋي جاۋىنگەرلىك، اسكەري-كولىكتىك، جاتتىعۋ ۇشاقتارى مەن تىكۇشاقتار بار. وتكەن جىلى اۆياسيالىق پارك 37 تونناعا دەيىن نەمەسە 100-دەن استام اسكەري قىزمەتشىنى ۇزاق قاشىقتىققا تاسىمالداۋعا قابىلەتتى كوپفۋنكسيونالدى ا400م اسكەري-كولىكتىك ۇشاعىمەن تولىقتى. اۋە كەمەسىن پايدالانعان جارتى جىل ىشىندە ەكيپاج جەكە قۇرامدى تاسىمالداۋدا ءبىرقاتار مىندەتتەردى ورىندادى. ونىڭ ىشىندە گولان جوتالارىنداعى بىتىمگەرلەردى روتاسيالاۋ، قازاقستاندىق كوماندالاردىڭ بىرىككەن اراب امىرلىكتەرىنە UAE SWAT Challenge-2025 حالىقارالىق جارىستارىنا اپارىپ كەلۋ، "ايبىن-2025" حالىقارالىق اسكەري-پاتريوتتىق جاستار جيىنىن كولىكپەن قامتاماسىز ەتۋ بار.
اۋە قورعانىسى كۇشتەرىن دامىتۋدىڭ ماڭىزدى باسىمدىعى اۆتوماتتاندىرىلعان باسقارۋ جۇيەسىن ەنگىزۋ بولىپ وتىر. بۇل اۋە ءقاۋپى جاعدايىندا بارلىق بولىمشەلەردىڭ ءتيىمدى ءوزارا ءىس-قيمىلىن قامتاماسىز ەتۋگە، ونىڭ ىشىندە جەدەل اقپارات جيناۋدان باستاپ جاۋىنگەرلىك ءىس-قيمىلداردى ۇيلەستىرۋگە جانە ۇشۋدى باسقارۋعا مۇمكىندىك بەرەدى.
اۋە قورعانىسى كۇشتەرىندە جاۋىنگەرلىك داعدىلاردى ارتتىرۋ، ۇشۋ قۇرامىن كۇردەلى مىندەتتەردى ورىنداۋعا دايىنداۋ، جوعارى پيلوتاج داعدىلارىن يگەرۋ بويىنشا جۇيەلى جۇمىس جۇرگىزىلۋدە.
اسكەري ۇشقىشتار ءارقاشان بەيبىت تۇرعىندارعا كومەككە كەلۋگە دايىن. ارميالىق اۆياسيا ەكيپاجدارى ادامداردى ەۆاكۋاسيالاۋعا، 2024 جىلعى سۋ تاسقىنى كەزىندە ازىق-تۇلىك پەن گۋمانيتارلىق جۇكتەردى جەتكىزۋگە، اباي وبلىسىنداعى ورمان ءورتىن سوندىرۋگە جانە جەدەل دەن قويۋدى قاجەت ەتەتىن باسقا دا مىندەتتەرگە تارتىلدى.