بۇل تۋرالى الماتىنىڭ وڭىرلىك كوممۋنيكاسيالار قىزمەتىنىڭ بريفينگىندە الماتى ونكولوگيالىق ورتالىعىنىڭ ونكوگينەكولوگيا بولىمشەسىنىڭ مەڭگەرۋشىسى بولاتبەكوۆا رايحان حابارلادى.
اشىق ەسىك كۇنى 2025 جىلعى 18 قاڭتاردا ساعات 9:00-دەن 13:00-گە دەيىن الماتى ونكولوگيالىق ورتالىعىندا وتەدى. بۇل كۇنى ايەلدەر ونكوگينەكولوگتاردان كەڭەس الا الادى، الدىن-الۋ مۇمكىندىكتەرى تۋرالى بىلە الادى جانە جاتىر موينى پاتولوگياسىن ەرتە انىقتاۋ ءۇشىن تەكسەرۋدەن وتەدى، دەپ حابارلايدى aqshamnews.kz.
ۇيىمداستىرۋشىلار وسى مۇمكىندىكتى جاتىر موينى وبىرى جانە ونىڭ الدىن الۋ شارالارى تۋرالى حاباردارلىقتى ارتتىرۋ ءۇشىن پايدالانۋعا شاقىرادى. بۇل ايماقتاعى ايەلدەردىڭ دەنساۋلىعىن جاقسارتۋعا جانە سىرقاتتانۋشىلىقتى ازايتۋعا باعىتتالعان ماڭىزدى قادام، دەپ اتاپ ءوتتى رايحان ولمەسحان قىزى.
قاڭتار كوپتەگەن ەلدەردە جاتىر موينى وبىرى تۋرالى حاباردار بولۋ اپتالىعىنا ارنالعان. قاڭتار ايىندا وسى باستاما اياسىندا ونكولوگتار مەن گينەكولوگتار اۋرۋدىڭ باستاپقى جانە قايتالاما الدىن-الۋ شارالارى، العاشقى بەلگىلەرى مەن ەمدەۋ تاسىلدەرى تۋرالى ايتادى.