ولار ارنايى كۋرستاردان ءوتىپ جاتىر.
قازاقستاندا ءپان مۇعالىمدەرى بىلىكتىلىگىن ارتتىرۋعا ارنالعان تەگىن كۋرستاردان ءوتىپ جاتىر. بۇگىنگى تاڭدا ەلىمىز بويىنشا 18 مىڭنان استام ءمۇعالىم وقىپ شىقتى، دەپ حابارلايدى Almaty-akshamy.kz.
كۋرستار وسى جىلدىڭ تامىز ايىندا باستالعان بولاتىن. بۇل كۋرستاردى «ورلەۋ» بىلىكتىلىكتى ارتتىرۋ ۇلتتىق ورتالىعىنىڭ وكىلدەرى ازىرلەپ، وتكىزىپ جاتىر. ورتالىق 40 مىڭنان استام ءپان ءمۇعالىمىن وقىتۋدى جوسپارلاپ وتىر.
«ورلەۋ» ورتالىعى ءبىر ايدىڭ ىشىندە 700-گە جۋىق كۋرس وتكىزدى جانە وعان 18 مىڭنان استام ءمۇعالىم قاتىستى. بۇگىنگى كۇنى 5 مىڭ پەداگوگ وقىپ جاتىر، ولار كۋرستىڭ سوڭىندا تەست تاپسىرادى. كاسىبي بىلىكتىلىگىن ارتتىرعىسى كەلەتىن ۇستازدار سانىنىڭ جىل ساناپ ارتىپ كەلە جاتقانى قۋانتادى. مۇنداي كۋرستار ۇستازدار جۇمىسىنىڭ ساپاسىنا دا، ءبىلىم ساپاسىنا دا، جالپى، وقۋشىلاردىڭ بىلىمىنە دە وڭ اسەر ەتەتىنىن ءتۇسىنۋ ماڭىزدى»، - دەپ اتاپ ءوتتى وقۋ-اعارتۋ مينيسترلىگىنىڭ «ورلەۋ» بىلىكتىلىكتى ارتتىرۋ ۇلتتىق ورتالىعى» اق باسقارما ءتوراعاسى اسەل مۇحامەتجانوۆا.
بۇعان دەيىن «ورلەۋ» ورتالىعىنىڭ 70-تەن استام مامانى 12 ءپان بويىنشا 44 باعدارلاما ازىرلەگەن بولاتىن. ماتەماتيكا، ينفورماتيكا، فيزيكا، حيميا، بيولوگيا، گەوگرافيا، جاراتىلىستانۋ، قازاق ءتىلى، ورىس ءتىلى، اعىلشىن ءتىلى، تاريح جانە باستاۋىش سىنىپ مۇعالىمدەرى بىلىكتىلىكتى ارتتىرۋ كۋرستارىنان تەگىن وتە الادى. كۋرستار قاراشا ايىنىڭ سوڭىنا دەيىن جالعاسادى.
كۋرستىڭ سوڭىندا وقىتۋدىڭ تيىمدىلىگىنە تالداۋ مەن مۇعالىمدەردىڭ العان بىلىمىنە قورىتىندى باعالاۋ جۇرگىزىلەدى. سونداي-اق مۇعالىمدەر مىندەتتى تۇردە تەست تاپسىرۋى كەرەك. بارلىق ءبولىم بويىنشا شەكتى بالل جيناعان مۇعالىمدەر سەرتيفيكات الادى.