قازاقستان كينوسىنشىلار قاۋىمداستىعى الماتىدا ءوتىپ جاتقان VII حالىقارالىق «بايقوڭىر» كينوفەستيۆالى شەڭبەرىندە «سىنشىلار تاڭداۋى» كينوجۇلدەسىنىڭ جەڭىمپازدارىن جاريالادى، دەپ حابارلايدى Almaty-akshamy.kz Inform.kz-كە سىلتەمە جاساپ.
پاندەميا سالدارىنان بۇل كينوجۇلدە سوڭعى رەت 2020 جىلى وتكىزىلگەن. ۇيىمداستىرۋشىلار كەيىنگى ەكى جىلدا جارىققا شىققان 40-تان استام تۋىندىنىڭ ىشىنەن ۇزدىكتەرىن انىقتادى. ناتيجەسىندە، 4 بىردەي نوميناسيادا ۇسىنىلعان فارحات شاريپوۆتىڭ «18 كيلوگەرس» كوركەم ءفيلمى «ۇزدىك فيلم» جۇلدەسىمەن ماراپاتتالدى. جۇلدەنى كينوسىنشىلار قاۋىمداستىعىنىڭ پرەزيدەنتى گۇلنار ابىكەيەۆا تابىستادى.
«شەتەلدە العان بىرنەشە جۇلدەمىز بار، الايدا تۋعان جەردە وسىنداي ماراپاتقا يە بولعانىمىزعا وتە قۋانىشتىمىز»، - دەدى ماراپاتتاۋ راسىمىندە ءفيلمنىڭ پروديۋسەرى دينا جۇمابەك.
ايتا كەتسەك، «18 كيلوگەرس» ءفيلمى العاش رەت حالىقارالىق ۆارشاۆا كينوفەستيۆالى شەڭبەرىندە كورسەتىلىپ، قازاق كينوسىنىڭ تاريحىندا تۇڭعىش رەت اتالعان فەستيۆالدىڭ باس جۇلدەسىن جەڭىپ العان بولاتىن. سونداي-اق، زارا ەسەناماننىڭ «حاردكور» پوۆەسىنىڭ جەلىسىمەن تۇسىرىلگەن بۇل فيلم گەرمانيادا وتكەن 30-شى حالىقارالىق كوتبۋس كينوفەستيۆالىندە «ۇزدىك فيلم» جۇلدەسىمەن ماراپاتتالىپ، قازان قالاسىندا وتكەن حالىقارالىق مۇسىلمان كينوسىنىڭ فەستيۆالىندە باس جۇلدەگە قول جەتكىزگەن.
«سىنشىلار تاڭداۋى» كينوجۇلدەسىنىڭ كەزەكتى جەڭىمپازى – «جانىم، ايتسام سەنبەيسىڭ» ءفيلمى. بۇل كەشتە اتالعان كينوتۋىندى «ۇزدىك جانرلىق فيلم» جۇلدەسىمەن ماراپاتتالدى. سونداي-اق، بۇل فيلم «ۇزدىك قويۋشى سۋرەتشى» (ءاليا ودينايەۆا)، «ەكىنشى پلانداعى ۇزدىك ەر ادام بەينەسى» (دۋلىعا اقمولدا)، «ۇزدىك ءان» («يرينا كايراتوۆنا» feat. Hiro، De Lacure & Fatbelly – Koke) نوميناسيالارىندا جەڭىسكە جەتتى.
«اتبايدىڭ شايقاسى» ءفيلمى ءۇش بىردەي جۇلدەمەن ماراپاتتالدى – «ۇزدىك رەجيسسەر» (ءادىلحان ەرجانوۆ)، «ۇزدىك اكتەر» (دانيار الشىنوۆ)، «ەكىنشى پلانداعى ۇزدىك ايەل بەينەسى» (دينارا باقتىبايەۆا).
قازاقستان مەن جاپونيا بىرلەسىپ تۇسىرگەن «بارىمتاشىلار» ءفيلمى «ۇزدىك سەناريي» (ەرلان نۇرمۇحامبەتوۆ جانە ليزا تاكەبا) جانە «ۇزدىك قويۋشى وپەراتور» (ءازيز جامباكييەۆ) جۇلدەلەرمەن ماراپاتتالدى.
اكتريسا جانە پروديۋسەر اسەل سادۋاقاسوۆا «ۇلبولسىن» فيلمىندە سومداعان ءرولى ءۇشىن «ۇزدىك ايەل بەينەسى» جۇلدەسىمەن، ال يتالياندىق كومپوزيتور ساندرو دي ستەفانو «وڭباعاندار» اتتى تراگيكومەدياسى ءۇشىن «ۇزدىك ءان» جۇلدەسىمەن ماراپاتتالدى.
«سىنشىلار تاڭداۋى» كينوجۇلدەسىندە بەس بىردەي نوميناسيادا ۇسىنىلعان الىشەر جادىگەروۆتىڭ «وتاۋ» ءفيلمى «ۇزدىك دەبيۋت» نوميناسياسىندا جەڭىسكە جەتتى.
سونداي-اق، قازاقاستان كينوسىنشىلار قاۋىمداستىعى قازاق دەرەكتى كينوسىنىڭ دامۋىنا قوسقان ۇلەسى ءۇشىن قانات بەيسەكەيەۆكە جانە قازاق ونلاين-سەريالدارىنىڭ دامۋىنا قوسقان ۇلەسى ءۇشىن انار ءجۇنىسوۆا مەن قۋات سادىقوۆقا ارنايى جۇلدەلەردى تابىستادى.
ەستەرىڭىزگە سالا كەتسەك، قازاقستان كينوسىنشىلار قاۋىمداستىعى ءوز جۇمىسىن 2015 جىلدان بەرى اتقارىپ كەلەدى. بۇگىنگى تاڭدا قاۋىمداستىقتىڭ مۇشەلىگىنە 15 كاسىبي سىنشى مەن كينوتانۋشى قابىلدانعان.