ۇسىك، بۇرشاق، داۋىل - ءبىرقاتار وڭىرلەردە كۇن سۋىتادى.
12 قىركۇيەكتە قازاقستان اۋماعىنىڭ باسىم بولىگى سولتۇستىك-باتىس انتيسيكلونىنىڭ ىقپالىندا بولادى، سوندىقتان جاۋىن-شاشىن جاۋمايدى، دەپ حابارلايدى Almaty-akshamy.kz.
"قازگيدرومەتتىڭ" بولجامىنا قاراعاندا، بۇگىن ەلىمىزدىڭ تەك سولتۇستىگى، شىعىسى جانە وڭتۇستىك-شىعىسىنا سيكلون مەن اتموسفەرالىق فرونتتار اسەر ەتەدى.
وسىعان بايلانىستى اتالعان وڭىرلەردە جاڭبىر جاۋادى، شىعىستا، وڭتۇستىك-شىعىستا قاتتى جاڭبىر جاۋىپ، نايزاعاي وينايدى.
تۇندە الماتى وبلىسىنىڭ تاۋلى اۋداندارىندا نوسەر جاۋىن-شاشىن بولادى (جاڭبىر جىلبىسقى قارعا اۋىسادى).
قازاقستان بويىنشا جەلدىڭ كۇشى - 15-23 م/س، ەلىمىزدىڭ شىعىسى مەن وڭتۇستىك-شىعىسىندا ەكپىنى 23-28 م/س جەتەدى. كۇندىز ماڭعىستاۋ وبلىسىندا شاڭدى داۋىل سوعادى. ەلدىڭ سولتۇستىگىندە، سولتۇستىك-باتىسىندا تۇندە جانە تاڭەرتەڭ تۇمان بولادى. كۇندىز جامبىل وبلىسىنىڭ تاۋلى اۋداندارىندا بۇرشاق جاۋادى.
قىزىلوردا، تۇركىستان، جەتىسۋ وبلىستارىنىڭ باسىم بولىگىندە، اباي وبلىسىنىڭ وڭتۇستىگىندە، شىعىسىندا، سولتۇستىگىندە، ورتالىعىندا، شىعىس قازاقستان وبلىسىنىڭ سولتۇستىك-شىعىسىندا، اتىراۋ وبلىسىنىڭ باتىسىندا توتەنشە ءورت ءقاۋپى، قوستاناي وبلىسىنىڭ وڭتۇستىگىندە جوعارعى ءورت ءقاۋپى ساقتالادى.
تۇندە اقمولا وبلىسىنىڭ سولتۇستىك-باتىسىندا، سولتۇستىك قازاقستان وبلىسىنىڭ سولتۇستىك-شىعىسىندا، قوستاناي، باتىس قازاقستان، اقتوبە وبلىستارىنىڭ سولتۇستىگىندە توپىراق بەتىندە 1-2 گرادۋس ۇسىك جۇرەدى.