18ء-شى ەمحانانىڭ جۇكتەمەسى كوپ.
ونىڭ ءۇش فيليالىندا، مەديسينالىق قىزمەتتەر كورسەتۋگە ارنالماعان ءۇي-جايلارىندا "تاۋگۇل-3"، "مامىر"، "قۋانىش"، "شابىت" جانە "اتامەكەن" شاعىناۋداندارىندا تۇراتىن 30 مىڭنان استام ادامعا قىزمەت كورسەتىلەدى، دەپ حابارلايدى Almaty-akshamy.kz.
اۋەزوۆ اۋدانى تۇرعىندارىمەن وتكەن كەزدەسۋىندە الماتى اكىمى ەربولات دوسايەۆ اتالعان مەديسينالىق مەكەمەنىڭ ماسەلەسىن شەشۋ ءۇشىن قانداي جۇمىستار جاسالىپ جاتقانىنا توقتالدى.
«مەنىڭ تاپسىرمام بويىنشا وتكەن جىلى ناۋرىز ايىندا "مامىر-1" شاعىناۋدانىندا 200 ادام قابىلدايتىن وتباسىلىق-دارىگەرلىك امبۋلاتوريانىڭ قۇرىلىسى باستالدى. ءقازىر جۇمىستار 80% جاسالدى، بيىل ناۋرىز ايىندا تولىق اياقتالۋى كەرەك»، - دەدى قالا باسشىسى ە.دوسايەۆ.
سونداي-اق "قۋانىش" شاعىناۋدانىندا №18 ەمحانانىڭ اۋىسىمدا 300 ادام قابىلدايتىن جاڭا نەگىزگى عيماراتىن سالۋ ءۇشىن جەر ۋچاسكەسىن ساتىپ الۋ جۇمىسى جالعاسۋدا. قازىرگى ۋاقىتتا جەر ۋچاسكەسىنىڭ يەسىمەن قۇنى كەلىسىلۋدە. وسى ايدىڭ سوڭىنا دەيىن جەر ۋچاسكەسىنە باعالاۋ جۇرگىزىلەدى. جەر ۋچاسكەسىنىڭ يەسى ونىڭ سوماسىمەن كەلىسكەن جاعدايدا، جەر ۋچاسكەسى ساتىپ الىنادى (بيۋدجەتتى ءبىرىنشى ناقتىلاعاننان كەيىن). كەلىسپەگەن جاعدايدا، جەر ۋچاسكەسى سوتپەن الىنادى.