17 ناۋرىز – شاڭىراق كۇنى قازاقستاندىقتاردىڭ جاس ۇرپاقتى تاربيەلەۋ مادەنيەتىن كورسەتە وتىرىپ، ولاردىڭ بويىندا پاتريوتيزم، ادامگەرشىلىك پەن ەڭبەكقورلىققا دەگەن قۇشتارلىقتى قالىپتاستىرۋعا ۇندەيدى.
قازاق مادەنيەتىندە شاڭىراقتىڭ قادىر-قاسيەتى ايرىقشا. ول – ءارى اسپان كۇمبەزى، ءارى ءۇي-جاي، ءارى تىرەك، ءارى باقۋاتتىلىق پەن قاۋىپسىزدىك جانە ۇرپاقتار ساباقتاستىعى.
ول – ۇرپاقتان-ۇرپاققا جالعاسىپ كەلە جاتقان ماتەريالدىق جانە رۋحاني مۇرا، سونىمەن قاتار وتباسىنىڭ تۇراقتىلىعى مەن ۇرپاقتىڭ ۇزدىكسىز جالعاسۋىنىڭ سيمۆولى.
شاڭىراق – وتباسى بەلگىسى، سوندىقتان دا قازاق حالقى جاس جۇبايلاردىڭ وتاۋ قۇرىپ، شاڭىراق كوتەرۋىنە ەرەكشە ءمان بەرگەن. اتا-بابالارىمىزدا «شاڭىراق كوتەرۋ» اتتى ەرەكشە ءداستۇر-سالت بولعان.
جالپى، ناۋرىز مەرەكەسىنىڭ جاڭا تۇجىرىمداماسى اياسىنداعى «شاڭىراق» كۇنى جالپىۇلتتىق وتباسىلىق قۇندىلىقتار مەن كىرشىكسىز ماحاببات كۇنىنە اينالادى دەۋگە نەگىز بار.