ءقازىر نۇرجان ءابدىراسىلوۆ شەتەلگە شىعۋعا دايىندىق ۇستىندە.
الماتىداعى رەسپۋبليكالىق فيزيكا-ماتەماتيكا مەكتەبىن ءتامامداپ، IT سالاسىن جەتىك مەڭگەرگەن 16 جاستاعى نۇرجان ءابدىراسىلوۆ ءوز تاڭداۋىن جاساعان، دەپ حابارلايدى Almaty-akshamy.kz حابار 24 تەلەارناسىنا سىلتەمە جاساپ.
ماتەماتيكا مەن IT سالاسىنا ىنتالى نۇرجان جەتىم بالالارعا ارنالعان اۆتورلىق باعدارلامالاۋ ءتىلىن ازىرلەگەن. ەندى جاس تۇلەك مۇحيت اسىپ، ءبىلىم الماق. مەكتەپ تابالدىرىعىن اتتاعان كۇننەن باستاپ نۇرجان ءابدىراسىلوۆ وقۋعا دەگەن ىنتاسىمەن، كوشباسشىلىق قاسيەتىمەن كوزگە تۇسكەن. ماتەماتيكا مەن IT سالاسىنىڭ تىلسىمىنا بويلاعان نۇرجان قازاقستاندىق جەتىم بالالارعا ارنالعان اۆتورلىق باعدارلامالاۋ ءتىلىن ازىرلەگەن. وسىنداي العىر بالاعا اقش-تىڭ بىرنەشە جوعارعى وقۋ ورنىنان شاقىرتۋ تۇسكەن.
«سونىڭ ىشىندە مەن US BERKLY دەگەن ۋنيۆەرسيتەتتى تاڭدادىم. ول كاليفورنيادا ورنالاسقان. بۇل - كوپ دارەجەلى ۋنيۆەرسيتەت. الەمدىك رەيتينگتە 4-ورىندا تۇر. Computer science، ياعني باعدارلامالاۋ سالاسىندا ورنالاسقان»، - دەدى مەكتەپ تۇلەگى نۇرجان ءابدىراسىلوۆ.
ماتەماتيكا مەن IT سالاسىنان ءارتۇرلى وليمپياداعا قاتىسقان زەرەك بالا سپورتتى دا سەرىك ەتكەن.
«ادامنىڭ سەرگەك جۇرۋىنە، ويلاۋ قابىلەتىنە سپورتتىڭ تيگىزەر ىقپالى كوپ. سوندىقتان تەك نۇرجان ەمەس، بارلىق بالامدى سپورتقا بەردىم. سپورت دەگەن بالانى ءوزىن-وزى بابىندا ۇcتاپ، الدىنا ماقسات قويۋىنا ىقپال ەتەدى، ءاردايىم وزىنەن-وزى اسىپ ءتۇسۋ ءۇشىن جۇمىس ىستەۋگە ۇيرەتىپ، مىنەزدى دامىتادى. وزىنە دەگەن ۇستانىمى ارتا تۇسەدى. ول ومىردە تەك سپورتتا ەمەس، باسقا سالالاردا قاتتى كومەكتەسەدى. سونداي ماقساتپەن ونى سپورتقا بەردىك. ەندى جۇزۋگە دە باردى. نەگىزى، بوكسپەن اينالىسادى»، - دەدى نۇرجاننىڭ اكەسى عازيز ءابدىراسىلوۆ.
ءقازىر نۇرجان شەتەلگە شىعۋعا دايىندىق ۇستىندە. اقش-تا وقۋىن ءتامامداعان سوڭ سول جەردە ءبىراز تاجىريبە جيناپ، قازاقستانعا كەلىپ قىزمەت ەتەمىن دەپ وتىر.