جالپىعا بىردەي دەكلاراسيالاۋ: قارجى مينيسترلىگى مەرزىمدەر تۋرالى ەسكە سالدى
15 قىركۇيەكتە زاڭدى تۇلعالاردىڭ باسشىلارى، قۇرىلتايشىلارى، جەكە كاسىپكەرلەر جانە ولاردىڭ جۇبايلارى ءۇشىن دەكلاراسيا تاپسىرۋ مەرزىمى اياقتالادى، دەپ حابارلايدى aqshamnews.kz
مەملەكەتتىك كىرىستەر كوميتەتىنىڭ مالىمەتىنشە، جىل باسىنان بەرى دەكلاراسيانى جالپى دەكلارانتتاردىڭ 60%-ى، ياعني 1،4 ميلليون ادام تاپسىرعان. جالپى، 2024 جىلى 2،4 ميلليون جەكە تۇلعا دەكلاراسيا تاپسىرۋعا مىندەتتى.
«دەكلاراسيا اكتيۆتەر مەن مىندەتتەمەلەر تۋرالى اقپاراتتى ەل ىشىندە جانە ونىڭ شەگىنەن تىس جەردە 31 جەلتوقسانعا دەيىنگى جاعداي بويىنشا كورسەتۋگە ارنالعان. سونىمەن قاتار، دەكلاراسيانى ۇسىنۋدان رەزيدەنت ەمەستەر، كوممەرسيالىق ەمەس ۇيىمداردىڭ قۇرىلتايشىلارى (قاتىسۋشىلارى) جانە اكسيونەرلەر بوساتىلادى»، — دەلىنگەن حابارلامادا.
ەسكە سالا كەتەيىك، وسى جىلدىڭ 1 قاڭتارىنان باستاپ جالپىعا بىردەي دەكلاراسيالاۋدىڭ ءۇشىنشى كەزەڭى باستالدى، ول كاسىپكەرلەر مەن ولاردىڭ جۇبايلارىن قامتىدى. بۇعان دەيىن قۇجاتتى تەك مەملەكەتتىك قىزمەتشىلەر مەن ولاردىڭ وتباسى مۇشەلەرى عانا ۇسىناتىن.
«سالىق مىندەتتەمەسىن ۋاقتىلى ورىنداماۋدان اۋلاق بولۋ ءۇشىن بارلىق ازاماتتاردان دەكلاراسيانى تۇرعىلىقتى جەرى (تىركەلگەن مەكەنجايى) بويىنشا الدىن الا تاپسىرۋدى سۇرايمىز»، — دەپ ەسكەرتتى قارجى مينيسترلىگى.