85 مىڭنان استام ادام ءالى دەكلاراسيانى تاپسىرماعان
جالپىعا بىردەي دەكلاراسيالاۋ اياسىندا سالىق دەكلاراسياسىن تاپسىرۋ مەرزىمىنىڭ اياقتالۋىنا 3 كۇن قالدى، دەپ حابارلايدى Almaty-akshamy.kz.
كىرىستەرى مەن مۇلكى تۋرالى دەكلاراسيا (270.00-نىسان) 2022 جىلعى 15 قىركۇيەككە دەيىنگى مەرزىمدە ەلەكتروندى تۇردە تۇرعىلىقتى جەرى بويىنشا مەملەكەتتىك كىرىستەر ورگانىنا ۇسىنۋ قاجەت.
ونى جاۋاپتى مەملەكەتتىك لاۋازىمدى اتقاراتىن ادامدار مەن ولاردىڭ جۇبايلارى، مەملەكەتتىك فۋنكسيالاردى ورىنداۋعا ۋاكىلەتتىلىك بەرىلگەن ادامدار مەن ولاردىڭ جۇبايلارى جانە مەملەكەتتىك فۋنكسيالاردى ورىنداۋعا ۋاكىلەتتىلىك بەرىلگەن ادامدارعا تەڭەستىرىلگەن ادامدار مەن ولاردىڭ جۇبايلارى تاپسىرۋى ءتيىس. سونىمەن قاتار «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋسيالىق زاڭىنا جانە «سىبايلاس جەمقورلىققا قارسى ءىس-قيمىل تۋرالى»، «قازاقستان رەسپۋبليكاسىنداعى بانكتەر جانە بانك قىزمەتى تۋرالى»، «ساقتاندىرۋ قىزمەتى تۋرالى»، «باعالى قاعازدار نارىعى تۋرالى» قازاقستان رەسپۋبليكاسىنىڭ زاڭدارىنا سايكەس دەكلاراسيانى تابىس ەتۋ مىندەتى جۇكتەلگەن ادامدار دەكلاراسيا تاپسىرۋ مىندەتتى.
«2021 جىلى جەكە تۇلعانىڭ اكتيۆتەرى مەن مىندەتتەمەلەرى تۋرالى دەكلاراسياسىن (250.00-نىسان) ۇسىنعان ادامدار 2022 جىلى كىرىستەرى مەن مۇلكى تۋرالى دەكلاراسيانى (270.00-نىسان) ۇسىنۋى ءتيىس. بۇل مىندەتتەمە مەملەكەتتىك قىزمەتتەن بوساتىلعان تۇلعالارعا جانە دەكلاراسيا تاپسىرۋعا مىندەتتى ازاماتتار ساناتىنان شىققان تۇلعالارعا دا قاتىستى»، - دەلىنگەن قارجى مينيسترلىگىنىڭ حابارلاماسىندا.
ەگەر سالىق دەكلاراسياسى مەرزىمىندە تابىس ەتىلمەسە، وندا سالىق ورگاندارى ءبار رەت ەسكەرتۋ جاسايدى. ەسكەرتۋ بەرىلگەننەن كەيىن ءبىر جىل ىشىندە جەكە تۇلعا تاراپىنان قايتالاپ بۇزۋشىلىق ورىن السا، 15 ايلىق ەسەپتىك كورسەتكىش مولشەرىندە ايىپپۇل سالىنادى.