«Qazaq Book Fair» كىتاپ كورمە-جارمەڭكەسىن ۇيىمداستىرۋشى – قازاقستان رەسپۋبليكاسىنىڭ ۇلتتىق كىتاپحاناسى جانە «فوليانت» باسپاسى». «فوليانت» – باسپا يندۋسترياسىندا 1996 جىلدان بەرى جۇمىس ىستەپ كەلە جاتقان كوپسالالى قازاقستاندىق باسپا.
باسپا جىل سايىن جۇزدەگەن الەمدىك ۇزدىك تۋىندىلاردى قازاق تىلىنە اۋدارىپ جانە باسىپ شىعارادى. فوليانتتىڭ اسسورتيمەنتىندە قازاق ادەبيەتىنىڭ جاۋھارلارى، الەمدىك كلاسسيكا، عىلىمي-تانىمدىق ەڭبەكتەردىڭ سان مىڭ ءتۇرى بار.
«Qazaq Book Fair» كىتاپ كورمە-جارمەڭكەسىنە «فوليانت» باسپاسى جانە «قاسىم» باسپا ءۇيى مەن «كنيجنىي كلۋب» باسپاسى قاتىسادى. حالىق اراسىندا كىتاپ وقۋدى ناسيحاتتاۋ ىسىندە كورمەنىڭ ماڭىزى زور. باسپا سالاسى دامىعان، كىتاپتى ءسۇيىپ وقيتىن ءار ەلدە كىتاپ كورمەسى ءجيى وتكىزىلەدى.
مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ ءۇشىنشى وتىرىسىندا:
«كىتاپقۇمارلىق – جاقسى قاسيەت. مىسالى، كوپتەگەن مەملەكەت ۇلتتىق كىتاپ كۇنىن اتاپ وتەدى. مەن ۇلتتىق كىتاپ كۇنىن بەلگىلەۋ تۋرالى ۇسىنىستى قولدايمىن. ءبىراق ونى مازمۇندى ەتىپ وتكىزۋ قاجەت. مىسالى، ءتۇرلى ءىس-شارالار ۇيىمداستىرىپ، ارنايى جارمەڭكەلەر وتكىزۋ قاجەت. شىن مانىندە، وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك»، - دەپ اتاپ وتكەندەي، بۇل كورمەنىڭ ماقساتى – بالالار مەن جاسوسپىرىمدەردى كىتاپ وقۋعا باۋلۋ، وتباسىمەن بىرگە كىتاپ وقۋدى ناسيحاتتاۋ، جاستاردىڭ وقىرماندىق تالعامىن قالىپتاستىرۋ.
«Qazaq Book Fair» كىتاپ كورمە-جارمەڭكەسى ءۇش كۇندىك مادەني-ىسكەرلىك باعدارلامادان تۇرادى. كورمە اياسىندا جاڭا كىتاپتاردىڭ تۇساۋكەسەرلەرى، اۆتورمەن كەزدەسۋ، اۆتوگراف-سەسسيالار وتكىزىلەدى. اتاپ ايتار بولساق، «فوليانت» باسپاسىنان جارىق كورگەن ۇلاربەك دالەي ۇلىنىڭ «جوشى حان» اتتى تاريحي رومانى، قاناعات ءابىلقايىردىڭ «پەرىشتەلەر جوق جەردە» كىتابى، الىشەر راحاتتىڭ «ماحابباتىم - Constant. پاراللەل» روماندارىنىڭ، «كنيجنىي كلۋب» باسپاسىنان جارىق كورگەن يۋريي سەرەبريانسكييدىڭ «چەرنايا زۆەزدا» كىتابى، دانيار قۋانتقانوۆتىڭ «ماريام» كىتابىنىڭ تانىستىرىلىمى جوسپارلانىپ وتىر. سونداي-اق جارمەڭكەدە گۇزەل ياحينا، الىبەك اسقاروۆ سياقتى جازۋشىلارمەن كەزدەسۋگە قاتىسىپ، اۆتوردىڭ قولتاڭباسىن الۋعا، كەز كەلگەن كىتاپتى باسپا باعاسىمەن ساتىپ الۋعا بولادى.
