مەدەۋ اۋدانىندا «مەكتەپكە جول» رەسپۋبليكالىق قايىرىمدىلىق اكسياسى باستالدى.
«مەكتەپكە جول» اكسياسى اياسىندا ورتالىق مادەنيەت جانە دەمالىس ساياباعىندا از قامتىلعان جانە كوپ بالالى وتباسىلاردان شىققان بالالارعا ارنالعان مەكتەپ كەرەك-جاراقتارى مەن وقۋشى كيىمدەرى تابىس ەتىلدى، دەپ حابارلايدى Almaty-akshamy.kz
قايىرىمدىلىق ءىس-شارا جىل سايىنعى نەگىزدە وتكىزىلەدى جانە اعىمداعى جىلى «مەكتەپكە جول» اكسياسى شەڭبەرىندە ءحاوت ساناتتارىنان شىققان 1213 وقۋشىنىڭ شوتىنا بيۋدجەت قاراجاتى ەسەبىنەن 43 000 تەڭگەدەن مەكتەپ فورماسىن الۋ ءۇشىن جىبەرىلدى. ونىڭ جالپى سوماسى 52 ملن. تەڭگەنى قۇرادى.
سونداي-اق، وسى اكسيا اياسىندا اۋدان دەمەۋشىلەرىنىڭ قولداۋىمەن 600 وقۋشىعا قوسىمشا كومەك كورسەتىلدى. بارلىق قاتىسۋشىلارعا مەكتەپ فورماسىن الۋ ءۇشىن سەرتيفيكاتتار بەرىلدى، مەكتەپ سومكەسى نەگىزگى كەڭسە تاۋارلارىمەن تولتىرىلدى جانە بالالارعا قوسىمشا اتتراكسيوندارعا بيلەتتەر تەگىن بەرىلدى.
2023-2024 وقۋ جىلىنا 1-سىنىپقا قابىلداۋ 1 ساۋىردەن باستالىپ، 2023 جىلدىڭ 1 تامىزىنا دەيىن جالعاستى. ناتيجەسىندە مەملەكەتتىك مەكتەپتەرگە – 2 888 بالا، جەكەمەنشىك مەكتەپتەرگە – 716 بالا قابىلداندى.
«بۇل ءىس-شارانىڭ ماقساتى – از قامتىلعان وتباسىلاردىڭ بالالارىنا جاردەمدەسۋ. بيىل 600-گە تارتا بالا مەكتەپكە قاجەتتى كەرەك-جاراق الدى. وسى شارۋانى اتقارۋعا مۇرىندىق بولعان كاسىپكەر جومارت جاندار دەر ەدىك. وسىنىڭ ءوزى بالالارعا دەگەن ۇلكەن كومەك»،-دەدى مەدەۋ اۋداندىق قوعامدىق دامۋ ءبولىمىنىڭ باسشىسى ساكەن ارالبايەۆ.