اقتوتى رايىمقۇلوۆا وتانداستارىن قازاق كينوسى كۇنىمەن قۇتتىقتادى.
ق ر مادەنيەت جانە سپورت ءمينيسترى اقتوتى رايىمقۇلوۆا قازاقستان حالقىن كينو كۇنىمەن قۇتتىقتادى، دەپ حابارلايدى Almaty-akshamy.kz.
«قۇرمەتتى دوستار! ءقادىرلى كينوگەرلەر!
سىزدەردى 12 قىركۇيەك – قازاق كينوسى كۇنىمەن شىن جۇرەكتەن قۇتتىقتايمىن!
كينو – مادەنيەت پەن ونەردىڭ كوش باسىندا تۇرعان، اۋديتورياسى تورتكۇل دۇنيەنى تورىنە وتىرعىزعان اۋقىمدى سالا. عۇمىرى عاسىرمەن ولشەنەتىن قازاق كينەماتوگرافياسى العاشقى قارلىعاشى «امانگەلدىدەن» باستاپ وسى كۇنگە شەيىن كورەرمەنگە ءتۇرلى تۋىندىلار تارتۋ ەتىپ كەلەدى»، -دەيدى مينيستر.«ءار كينونىڭ ۋاقىت كەڭىستىگىندەگى الار ورنىن ايقىندايتىن، بىلايشا ايتقاندا تاعدىرىن شەشەتىن قۇدىرەت – ول قالىڭ كورەرمەن ەكەنى ءسوزسىز. ءبىزدىڭ ەلىمىزدە بۇگىنگى كينو تالابىنا جاۋاپ بەرە الاتىن، كوپشىلىكتىڭ تالعام ۇدەسىنەن شىققان فيلمدەر قاتارى جىل وتكەن سايىن ارتىپ كەلە جاتقانى قۋانتادى.
شىنايى وقيعا جەلىسىمەن تۇسىرىلگەن، بابالار دانالىعىن دارىپتەگەن، اتالار اماناتىن ارقالاعان تاريحي تۋىندىلارمەن قاتار كوزى قاراقتى ءار ادامدى نەمقۇرايدى، جايباقارات قالدىرمايتىن، الەۋمەتتىك ماسەلەلەردىڭ وزەكتىلىگىن جۇرەككە جەتكىزىپ، تولعاندىراتىن وتاندىق تۋىندىلار بەدەلدى حالىقارالىق فەستيۆالدەردە جۇلدەگە يە بولىپ، الەمدىك كينوگەرلەردىڭ جوعارى باعاسىن الىپ جاتىر. الدىڭعى اعا بۋىننىڭ ءىزىن باسىپ، وزىندىك ورنەگىن قالىپتاستىرىپ كەلە جاتقان جاس ماماندار شوعىرى قالىپتاستى.
مەملەكەت كينەماتوگرافيا سالاسىنا تۇراقتى قولداۋ كورسەتۋدى جالعاستىرا بەرەدى. ەلىمىزدەگى كينو نارىقتا تاقىرىبى جاعىنان ءار الۋان قازاقستاندىق فيلمدەرمەن قوسا الەمدىك تانىمال كينوستۋديالاردىڭ تاڭداۋلى ونىمدەرى كوپ. اتالعان كارتينالاردىڭ ءبارى ەندى انا تىلىمىزدە اۋدارمامەن كورسەتىلۋى مىندەتتى ەكەنى ارنايى زاڭدا كورسەتىلگەن. وسى رەتتە ءبىرقاتار انيماسيالىق تۋىندىنىڭ قازاق تىلىندەگى دۋبلياجىن تۇسىرگەن كومپانيانىڭ ءوزى الەمدىك نارىقتا جوعارى باعالاعانىن ايتپاي كەتۋگە بولماس. بۇدان بولەك، ءقازىر مينيسترلىك كەڭەس ۇكىمەتى كەزىندە كورەرمەنگە جول تارتقان وتاندىق كينولاردى رەسەيدىڭ مەملەكەتتىك كينو قورىنىڭ ارحيۆىنەن ساندىق فورماتتا وڭدەپ الۋ بويىنشا جۇمىس جۇرگىزىپ جاتىر.
الداعى ۋاقىتتا دا زاماننىڭ زاڭعارى مەن ءومىردىڭ زاڭدارىن جاندى بەينەگە اينالدىرعان مازمۇندى فيلمدەرىمىز كوبەيىپ، حالىقارالىق بايقاۋلاردا ۇزدىك شىعا بەرۋىنە تىلەكتەسپىن.
وسىناۋ ەرەكشە ءساتتى پايدالانا وتىرىپ، سالا ماماندارىنا مىقتى دەنساۋلىق، قاجىماس قايرات، شىعارماشىلىق شابىت، تولايىم تابىس تىلەيمىن!»، - دەپ جازدى مادەنيەت جانە سپورت ءمينيسترى ءوزىنىىڭ instagram الەۋمەتتىك پاراقشاسىندا.