ءبىز بيزنەس پەن ازاماتتارىمىزعا اۆتوكولىكتى جاڭارتۋعا دا، ەكولوگيانى جاقسارتۋعا دا كومەكتەسەمىز - رومان سكليار.
ق ر پرەمەر-مينيسترىنىڭ ءبىرىنشى ورىنباسارى رومان سكليار جەڭىلدەتىلگەن اۆتونەسيە باعدارلاماسى تۋرالى ايتىپ بەردى، دەپ حابارلايدى قازاقپارات ءتىلشىسى.
«ءبىز مولشەرلەمەنى 50%-عا تومەندەتتىك، وكم (وندىرۋشىلەردىڭ كەڭەيتىلگەن مىندەتتەمەلەرى) قاراجاتى ءتۇسىپ تۇرادى. بۇل اقشا ەكولوگيالىق ءىس-شارالارعا دا، وسىنداي باعدارلامالارعا دا جۇمسالادى. مەن ءقازىر ايتقان باعدارلامالار ەكولوگيانى جاقسارتادى. ءبىز بيزنەس پەن ازاماتتارىمىزعا اۆتوكولىكتى جاڭارتۋعا دا، ەكولوگيانى جاقسارتۋعا دا كومەكتەسەمىز»، - دەدى رومان سكليار ۇكىمەت كۋلۋارىندا تىلشىلەرگە بەرگەن سۇحباتىندا.
ۆيسە-پرەمەر جەڭىلدىكپەن اۆتونەسيەلەندىرۋدى قوسىمشا قارجىلاندىرۋ مۇمكىندىگى بولسا، مىندەتتى تۇردە پايدالاناتىنىن ايتتى.
«باعدارلاما حالىق اراسىندا وتە تانىمال. جەڭىلدەتىلگەن اۆتونەسيەلەۋگە 100 ملرد تەڭگە بولىنگەن، باعدارلامانى 12 مىڭنان استام تۇرعىن پايدالاندى»، - دەدى رومان سكليار.
ەسكە سالا كەتەيىك، اۆتوكولىكتەردى جەڭىلدەتىلگەن نەسيەمەن بەرۋ باعدارلاماسىنا تاعى 10 ملرد تەڭگە ءبولىندى. يندۋستريا جانە ينفراقۇرىلىمدىق دامۋ مينيسترلىگىنە قاراستى ونەركاسىپتى دامىتۋ قورىنىڭ دەرەگىنشە، 4 پايىزبەن بەرىلەتىن اۆتونەسيە باعدارلاماسىنا قاتىسۋشى «ەۋرازيالىق بانككە» - 35 ملرد، «بانك سەنتر كرەديتكە» - 27،5 ملرد، «حالىق بانككە» - 22،5 ملرد جانە «Forte Bank»-كە 15 ملرد تەڭگە بولىنگەن.