«قتج» ۇك» اق - نىڭ 2023 جىلعى قىزمەتىنىڭ قورىتىندىلارى جانە 2024 جىلعا ارنالعان جوسپارلار كومپانيانىڭ ەنشىلەس ۇيىمدارى مەن بارلىق وڭىرلىك بولىمشەلەرى وكىلدەرىنىڭ، كولىك مينيسترلىگى مەن «سامۇرىق-قازىنا» اق باسشىلىعىنىڭ قاتىسۋىمەن كەڭەيتىلگەن كەڭەستە تالقىلاندى.
وندىرىستىك كورسەتكىشتەر ءوسىمى وڭ قارقىنىنىڭ ساقتالۋى اتاپ ءوتىلدى. پايدالانۋ جۇك اينالىمى 269 ملرد. ت-كم-گە جەتىپ، وتكەن جىلعا قاراعاندا 7% ءوستى، دەپ حابارلايدى Almaty-akshamy.kz «قازاقستان تەمىرجولشىسى» باسىلىمىنا سىلتەمە جاساپ.
كونتەينەرلەردەگى ترانزيتتىك تاسىمالدار 1 ملن 28 مىڭ جفە قۇراسا، بۇل وتكەن كەزەڭمەن سالىستىرعاندا 13،5% ارتىق. قازاقستان مەن جۇڭگو تەمىر جولدارى اراسىنداعى جۇكتەردى تاسىمالداۋ كولەمى 22% ءوسىپ، 28 ملن تونناعا جەتتى. بۇل ەلدەر اراسىنداعى تەمىرجول بايلانىسى اشىلعاننان بەرگى ماكسيمالدى كورسەتكىش.
2023 جىلى سوڭعى جىلدارى جولدى جوندەۋدىڭ اۋقىمدى كولەمى ورىندالدى. 1443 كم تەمىرجول توسەمى ساۋىقتىرىلدى. جىل بويى ەلدىڭ سەنىمدى حالىقارالىق ترانزيتتىك حاب رەتىندە قالىپتاسۋىنا جاعداي جاساۋ بويىنشا جۇمىس جۇرگىزىلدى. كومپانيا ءۇشىن عانا ەمەس، رەسپۋبليكا ءۇشىن دە ءىرى ينفراقۇرىلىمدىق جوبالاردى ىسكە اسىرۋ ماڭىزدى وقيعالار بولدى: داربازا – ماقتاارال، باقتى – اياگوز تەمىر جول جەلىلەرىن (قىتايمەن ءۇشىنشى شەكارا وتكەلىنىڭ اشىلۋىمەن) سالۋ، الماتىنىڭ اينالاسىنداعى اينالما جول. دوستىق – مويىنتى ۋچاسكەسىندە 300 شاقىرىمنان استام ەكىنشى جول سالىندى. سيان قالاسىنىڭ قىتايلىق قۇرعاق پورتىندا قازاقستاننىڭ جۇك تەرمينالى سالىندى.
قتج قازاقستاننىڭ بارلىق وڭىرلەرىندە فيليالدىق جەلىسى بار ءىرى ۇلتتىق كومپانيا بولىپ تابىلادى. قىزمەتكەرلەر سانى 116 مىڭنان اسادى. 2023 جىلى جالاقى 20% - عا ءوستى. بۇگىنگى تاڭدا كومپانيانىڭ وندىرىستىك پەرسونالىنىڭ ورتاشا جالاقىسى رەسپۋبليكالىق دەڭگەيدەن 26% اسىپ ءتۇستى.
2023 جىلى قىزمەتكەرلەردىڭ سانيتارلىق-تۇرمىستىق ەڭبەك جاعدايلارىن جاقسارتۋ بويىنشا اۋقىمدى ءىس-شارالار وتكىزىلدى. 228 عيمارات، 467 ءۇي-جاي جانە لوكوموتيۆ بريگادالارىنىڭ 37 دەمالىس ءۇيى جوندەلدى. جەلىلىك قىزمەتكەرلەردى جۇمىس ورنىنا جەتكىزۋ ءۇشىن 384 بىرلىك كولىك ساتىپ الىندى.
قتج جەلىسى بويىنشا جۇمىس جۇرگىزۋ ءۇشىن شالعايداعى ستانسيالارعا (دۋش كابينالارى، تۇرمىستىق تەحنيكا، جيھاز، ىدىس-اياق جانە ت.ب.) شىعاتىن تەمىرجولشىلاردىڭ تولىققاندى دەمالۋىنا قاجەتتى بارلىق زاتتارمەن جابدىقتالعان 132 مودۋلدىك عيمارات ورناتىلدى. عيماراتتارعا بارلىق قاجەتتى ينجەنەرلىك كوممۋنيكاسيالار قوسىلعان. 2024 جىلى 120 استام مودۋلدىك عيمارات ورناتۋ جوسپارلانۋدا. سونىمەن قاتار، بۇكىل ەل بويىنشا توزىعى جەتكەن قۇرىلىستاردى اۋىستىرۋ ءۇشىن تەمىرجولدار بويىنداعى ارالىقتاردا 1224 جىلىتۋ پۋنكتى ورناتىلدى، وندا تەمىرجولشىلار جۇمىس كەزىندە جاڭبىر مەن جەلدەن پانالاي الادى. قولايلى ەڭبەك جاعدايلارىن جاساۋ جونىندەگى جۇمىس جالعاستىرىلاتىن بولادى.
ۇلتتىق كومپانيا قىزمەتىنىڭ باسىم باعىتى تاسىمالداۋ قاۋىپسىزدىگىن قامتاماسىز ەتۋ بولىپ قالا بەرەدى. سونداي-اق، 2024 جىلدىڭ نەگىزگى مىندەتتەرىنىڭ ءبىرى – تاسىمالداۋ كولەمىن ۇلعايتۋ جانە ءترانزيتتى دامىتۋ، سيفرلاندىرۋ باعدارلامالارىن ىسكە اسىرۋ، تەمىرجول ينفراقۇرىلىمى مەن جىلجىمالى قۇرامدى جاڭارتۋ.