2021 جىلى كورۋ، ەستۋ جانە تىرەك-قيمىل اپپاراتى بۇزىلعان ادامدار ءۇشىن 251،8 ملن تەڭگەگە 113 ارنايى جۇمىس ورنىن قۇرۋ جوسپارلانعان.
ۇستىمىزدەگى جىلدىڭ التى ايىندا مەملەكەتتىك باعدارلاما اياسىندا 11،6 مىڭ مۇگەدەكتىگى بار ادامعا (مبا) جۇمىسپەن قامتۋدى قولداۋ شارالارى كورسەتىلدى، دەپ حابارلايدى Almaty-akshamy.kz.
«9،4 مىڭ مبا جۇمىسقا ورنالاستىرىلسا، ونىڭ ىشىندە 3،3 مىڭى تۇراقتى جۇمىس ورىندارىنا، ال 6،1 مىڭى ۋاقىتشا جۇمىس ورىندارىنا (الەۋمەتتىك جۇمىس ورىندارى، جاستار تاجىريبەسى جانە قوعامدىق جۇمىستار) تۇرعىزىلدى. جوعارىدا اتالعان كەزەڭدە قىسقا مەرزىمدى كاسىپتىك وقىتۋمەن 362 ادام قامتىلدى. «باستاۋ بيزنەس» جوباسى بويىنشا كاسىپكەرلىك نەگىزدەرىنە 1185 مبا وقىتىلدى، ونىڭ ىشىندە 127ء-سى ءوز جوبالارىن قورعاپ شىقسا، 45ء-ى گرانت، 2ء-ى شاعىن نەسيە الدى»، – دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
مامانداردىڭ حابارلاۋىنشا، «ەڭبەك» مەملەكەتتىك باعدارلاماسى اياسىندا 158 ادام شاعىن نەسيە السا، تاعى 524 مۇگەدەكتىگى بار ادامعا قايتارىمسىز گرانت ءبولىندى.
بۇدان باسقا، مبا ارنالعان جۇمىس ورىندارى كۆوتاسى شەڭبەرىندە 4،4 مىڭ ادام جۇمىسقا ورنالاستىرىلدى. ءتيىستى كۆوتالاردى جەرگىلىكتى اتقارۋشى ورگاندار «حالىقتى جۇمىسپەن قامتۋ تۋرالى» زاڭىنا سايكەس، اۋىر، ەڭبەك جاعدايى زياندى جانە ءقاۋىپتى جۇمىستارداعى جۇمىس ورىندارىن ەسەپتەمەگەندە، جۇمىس ىستەيتىندەردىڭ جالپى سانىنىڭ 2-دەن 4%-عا دەيىنگى (كەمىندە 50 ادام) مولشەرىندە بەلگىلەيدى.
«سونىمەن قاتار، حالىقارالىق تاجىريبە نەگىزىندە، مۇگەدەكتىگى بار ادامداردى جۇمىسقا ورنالاستىرۋ ءۇشىن ارنايى جۇمىس ورنىن جابدىقتاۋعا جۇمىس بەرۋشىلەردىڭ شىعىنىن سۋبسيديالاۋ ەنگىزىلدى. 2021 جىلى كورۋ، ەستۋ جانە تىرەك-قيمىل اپپاراتى بۇزىلعان ادامدار ءۇشىن 251،8 ملن تەڭگەگە 113 ارنايى جۇمىس ورنىن قۇرۋ جوسپارلانعان»، – دەپ حابارلايدى باسپا ءسوز قىزمەتى.
اعىمداعى جىلدىڭ 1 شىلدەسىندەگى جاعداي بويىنشا، 19،3 ملن تەڭگە يگەرىلىپ، 9 ارنايى جۇمىس ورنى قۇرىلعان.