بىرىككەن ۇلتتار ۇيىمىنىڭ شەشىمىمەن 11 اقپان كۇنى عىلىمداعى ايەلدەر مەن قىز بالالاردىڭ حالىقارالىق كۇنى رەتىندە اتالىپ وتىلەدى. بۇل كۇن ايەلدەر مەن قىزداردىڭ عىلىمعا تولىق جانە تەڭ قول جەتكىزۋىن قامتاماسىز ەتۋ، ولاردىڭ قۇقىقتارى مەن مۇمكىندىكتەرىن قورعاۋ، سونداي-اق عالىم ايەلدەردى قولداۋ جانە ولاردىڭ عىلىمي-زەرتتەۋ قىزمەتىنە بەلسەندى قاتىسۋىن ىنتالاندىرۋ ماقساتىندا بەلگىلەنگەن، دەپ حابارلايدى aqshamnews.kz
سوڭعى 15 جىلدا بۇكىل الەمدە نازىك جاندىلاردى عىلىمعا تارتۋ ماقساتىندا كوپتەگەن شارالار جۇزەگە اسىرىلۋدا. الەم بويىنشا عالىم ايەلدەردىڭ ۇلەسى 30%-دى قۇرايدى. قازاقستاندا دا سوڭعى ۋاقىتتا عالىم ايەلدەر سانى ارتقان. ۇلتتىق ستاتيستيكا بيۋروسىنىڭ مالىمەتتەرى بويىنشا، قازاقستاندا عىلىمي-زەرتتەۋ جانە تاجىريبەلىك-كونسترۋكتورلىق جۇمىستارمەن اينالىساتىن ايەل عالىمداردىڭ ۇلەسى 54%-دى قۇرايدى.
ايەلدەردىڭ عىلىمداعى جەتىستىكتەرى:
- فرەنسيس ارنولد – حيميا سالاسىنىڭ مامانى، 2018 جىلى نوبەل سىيلىعىن الدى.
- دوننا ستريكلەند – لازەرلىك فيزيكا جانە وپتيكا سالاسىنداعى كانادالىق عالىم، 2018 جىلى نوبەل سىيلىعىنىڭ لاۋرەاتى.
- دجەين گۋدولل – اعىلشىن پريماتولوگى، انتروپولوگى، بۇۇ-نىڭ بەيبىتشىلىك ەلشىسى، شيمپانزەلەردى زەرتتەۋدىڭ جەتەكشى ساراپشىسى.
يۋنەسكو مالىمەتتەرى بويىنشا، الەمدە زەرتتەۋشىلەردىڭ 30%-ى ايەلدەر بولىپ تابىلادى. الايدا، ايەلدەر ءالى دە عىلىمدا گەندەرلىك كەدەرگىلەرمەن كەزدەسۋدە. ايەلدەردىڭ عىلىمداعى جەتىستىكتەرى مەن ۇلەسى قوعامنىڭ دامۋىنا زور ىقپال ەتەدى.