الەۋمەتتىك جەلىدە پاريج وليمپياداسىنا قاتىساتىن قازاقستان قۇراماسىنىڭ فورماسى سىنعا ىلىكتى.
وقىرمان سپورتشىلاردىڭ پيدجاكتارى مەن گالستۋكتەرى ناشار تىگىلگەن "مەكتەپ فورماسىنا" ۇقساس دەپ جازدى، دەپ حابارلايدى Almaty-akshamy.kz
ال ۇكىمەت باسشىسىنىڭ ورىنباسارى تامارا دۇيسەنوۆا وليمپياداشىلاردىڭ كيىم ۇلگىسىن تالقىلاعاننان گورى، جاقسى ناتيجە كۇتۋ كەرەك ەكەنىن ايتتى.
2024 جىلعى جازعى وليمپيادا ويىندارى 26 شىلدەدە باستالىپ، 11 تامىزدا اياقتالادى. سپورتشىلارىمىز جارىسقا دايىندالىپ جاتقانىمەن، جەلى قولدانۋشىلارى وليمپيادا قۇرامالارىنىڭ فورماسىن سىنعا الدى.
قازاقستان قۇراماسىنىڭ كيىم ۇلگىسى ەكىنشى بايقاۋدان كەيىن عانا ماقۇلداندى. سەبەبى ءبىرىنشى بايقاۋدىڭ قورىتىندىسى بويىنشا كوميسسيانىڭ بىردە-بىر ەسكيزى ۇناماعان كورىنەدى. وسىلايشا تۋريزم جانە سپورت مينيسترلىگى كيىمدەردى يسپانيالىق Joma كومپانياسى تىگەدى دەپ ۋادە بەردى.
قازاقستاندىقتاردىڭ باسىم بولىگى وليمپياداعا قاتىساتىن سپورتشىلار كوستيۋمدەرىنىڭ سوڭعى نۇسقاسىن تاياۋدا پرەزيدەنتتىڭ قابىلداۋىنداعى فوتولاردان عانا كوردى. وسى رەتتە وقىرماندار وليمپيادا فورماسىن مەكتەپ فورماسىنا بالاپ، تالعامسىز ءارى ناشار تىگىلگەن دەپ پىكىر جازدى.
«پيدجاكتىڭ جەڭى قىسقا، بەلدەمشەسىندە اق جولاقتارى بار. قىرى سىنعان شالبارلار مەن تىزەگە دەيىن سوزىلعان بەلدەمشەلەر؟ مۇنداي كيىممەن جاسوسپىرىمدەر مەكتەپ ءبىتىرۋ البومىنا سۋرەتكە تۇسەدى»؛
بۇل جەردە سپورتشىلارىمىزدى ەشكىم قورلاپ تۇرعان جوق. الايدا وسى فورمانى شاراسىزدىقتان كيەتىنى وتە وكىنىشتى؛
قانشا جىلدان بەرى "قازاقتىڭ" ەركىن، دالا حالقى ەكەنى نەگە ەسكەرىلمەيدى؟ ءبىزدىڭ "Nomad" ءستيلدى ەسكەرىپ، كوپ يدەيالاردى جۇزەگە اسىرۋعا بولاتىن ەدى. جەلدەن، كۇننەن، شەكسىز دالادان شابىت الىڭىز! ال موڭعولدار ءۇشىن وتە قۋانىشتىمىن. ءوز ۇلتىن حالىقارالىق ارەنادا لايىق كورسەتىپ وتىر؛
تەاتر كوستيۋمى مەن مەكتەپ فورماسىن كوبىرەك ەسكە تۇسىرەدى. مۇنىسى ارزان ءمۋلتفيلمنىڭ كەيىپكەرلەرىنە تىگىلگەن ۇلگىلەر سەكىلدى.
بورتسەرىكتەرگە ۇقساپ تۇر. مەنىڭ ويىمشا، بۇل ستيۋاردتارعا ساي. جۇمىس ىستەۋگە ىڭعايلى ءارى ىستىقتامايدى. الايدا وليمپيادا قۇراماسى ءۇشىن تىم وعاش كورىنەدى. مىناۋ قىسقا جەڭدى كيگەن سپورتشىلار ماعان بالۋاندار مەن زىلتەمىرشىلەردى ەلەستەتەدى.
بىزدىكىلەر مەكتەپكە جينالىپ جاتىر ما؟
11 "ا" ۆينەتكاسى كۇشتى شىعىپتى»، دەگەن پىكىرلەر جازىلعان.
پرەمەر-مينيستردىڭ ورىنباسارى تامارا دۇيسەنوۆا دا وتانداستارىمىزدىڭ فورماسىنا قاتىستى پىكىر ءبىلدىردى.
"مەنىڭ ويىمشا، بۇل – جاقسى فورما. ءار ەلگە ءوز كيىم فورماسى ۇنايدى. بىزگە وزىمىزدىكى ۇناپ تۇر. ارىپتەستەر، بۇل قاراپايىم فورما. ودان دا جاقسى ناتيجە كۇتەيىك"، – دەدى دۇيسەنوۆا.
بۇدان بۇرىن تۋريزم جانە سپورت ءمينيسترى ەرمەك مارجىقپايەۆ پاريجدە وتەتىن ويىنداردا ازيا ويىندارىنداعىداي كيىمنىڭ جىرتىلمايتىنىنا سەندىرگەن ەدى.