كاسىپكەر تيمۋر تۋرلوۆ قازاقستان فۋتبول قۇراماسىنا گرەكيانى جەڭۋگە موتيۆاسيا بەردى
Freedom Holding Corp كومپانياسىنىڭ باس ديرەكتورى تيمۋر تۋرلوۆ قازاقستان فۋتبول قۇراماسىنا ۇلتتار ليگاسىنىڭ جارتىلاي فينالدىق پلەي-وفف ماچىندا گرەكيا قۇراماسىن جەڭەتىن بولسا 100 ميلليون تەڭگە سىياقى بەرمەك، دەپ حابارلايدى Almaty-akshamy.kz.
سىياقى كاپيتاننىڭ قالاۋى بويىنشا كومانداعا ۇلەستىرىلەدى.
شەشۋشى كەزدەسۋ 21 ناۋرىزدان 22 ناۋرىزعا قاراعان ءتۇنى افينادا وتەدى. ماچتىڭ جەڭىمپازى گرۋزيا مەن ليۋكسەمبۋرگ اراسىنداعى ويىندا جەڭىسكە جەتكەن قۇرامامەن پلەي-وفف كەزەڭىنىڭ فينالىندا وينايدى.
«فۋتبولدان ەۋروپا چەمپيوناتىنا جولداما بۇرىن-سوڭدى بۇلاي جاقىن بولعان ەمەس. بۇل قازاقستاندىق فۋتبول ءۇشىن دە، ەل ءۇشىن دە ماڭىزدى ءسات. كوز الدىمىزدا ۇلتتىق قۇراما تاريح جاساۋدا جانە ءقازىر ولارعا قولداۋ كورسەتۋ بۇرىنعىدان دا ماڭىزدىراق. سپورتشىلار ۇزاق جولدان ءوتتى، ءبىراق الدا ەۋرو-2024 ىرىكتەۋدەگى ەڭ ماڭىزدى ويىن. جۇلدە كومانداعا قوسىمشا موتيۆاسيا بەرەدى دەپ سەنەمىن، سونىمەن قاتار بارلىعىمىزدىڭ قازاقستان قۇراماسى ءۇشىن بىرگە جانكۇيەر بولۋىمىز دا ۇلكەن سىي بولادى دەپ ويلايمىن»! – دەدى تۋرلوۆ.
2022 جىلى تيمۋر تۋرلوۆ قازاقستان فۋتبول فەدەراسياسىنىڭ اتقارۋشى كوميتەتىنىڭ قۇرامىنا كىردى.