ەلوردادا مۇقتاج ادامداردىڭ ۇيىنە گاز بەرىلەدى.
استانا اكىمدىگى جانە Halyk Bank الماتى جانە سارىارقا اۋداندارىنداعى 100 جەكە ءۇيدى تەگىن گازداندىرۋ تۋرالى مەموراندۋمعا قول قويدى، دەپ حابارلايدى اlmaty-akshamy.kz.
گازداندىرۋ حالىقتىڭ الەۋمەتتىك تۇرعىدا وسال توپتارى (ءحاوت) ساناتىنداعى ازاماتتاردىڭ تۇرعىنۇيلەرىنە، ولاردىڭ اراسىندا جالعىزباستى زەينەتكەرلەرگە، كوپ بالالى وتباسىلارعا جانە مۇگەدەكتىگى بار ادامدارعا جۇرگىزىلەدى.
جالپى بيۋدجەتى 230 ملن تەڭگەنى گازداندىرۋ جوباسى Halyk Bank-تىڭ 100 جىلدىعىنا ارنالعان «100 يگى ءىس» اۋقىمدى ناۋقانى اياسىندا ىسكە اسىرىلۋدا. 2023 جىلى Halyk Bank قاراجاتى ەسەبىنەن مۇقتاجدىعى بار وتباسىلارعا 230-عا جۋىق تۇرعىن ءۇيى – استاناداعى 100 ءۇيدى جانە الماتى قالاسىنىڭ ناۋرىزباي، الاتاۋ جانە مەدەۋ اۋداندارىندا تۇراتىن 130 ءۇيدى گازعا تولىقتاي قوسۋ ءۇشىن قارجىلاندىرۋ جوسپارلانۋدا.
«استانادا الماتى جانە سارىارقا اۋداندارى گازبەن تولىق قامتاماسىز ەتىلگەن. بۇل شامامەن – 12 مىڭ وتباسى. ونىڭ ىشىندە 8 مىڭنان استام ابونەنت گازعا قوسىلدى. ۇيلەردى گازعا قوسۋ شىعىندارىن ازايتۋ ءۇشىن ۇلكەن جۇيەلى جۇمىس جۇرگىزۋدەمىز: حالىقتىڭ الەۋمەتتىك وسال توپتارى ءۇشىن 450 مىڭ تەڭگەگە جۋىق سوماعا گازداندىرۋ شىعىندارىنا وتەماقى كوزدەلگەن، سونداي-اق قۇنى 150 مىڭ تەڭگەگە جۋىق ەسەپتەۋ اسپاپتارى تەگىن بەرىلەدى. بۇرىن بانكپەن پايىزسىز نەسيەلەۋ باعدارلاماسى ىسكە قوسىلعان بولاتىن. ەندى Halyk Bank-پەن بىرلەسىپ، ەلورداداعى 100 ءۇيدى تەگىن گازداندىرۋ جوباسىن ىسكە اسىرۋعا كىرىسەمىز. قالعان اۋداندار بويىنشا گاز قۇبىرىن جەتكىزۋ جەلىلەرىن، كۆارتالىشىلىك جەلىلەردى سالۋ جۇمىستارى كەلەسى جىلى جۇرگىزىلەدى. گازداندىرۋ پروسەسى مەملەكەت باسشىسىنىڭ باقىلاۋىندا»، – دەدى استانا اكىمى جەڭىس قاسىمبەك.
قازىرگى ۋاقىتتا ەلوردا اكىمشىلىگى ءحاوت ساناتىنا جاتاتىن مۇقتاج ادامداردىڭ ءتىزىمىن ۇسىندى. ولارعا ماتەريالدىق جاعدايى گازداندىرۋدى ءوز بەتىنشە تولەۋگە مۇمكىندىگى جوق تۇرعىندار ەنگىزىلدى.
بانكتىڭ باسقارما ءتوراعاسى ءۇمىت شاياحمەتوۆانىڭ ايتۋىنشا، Halyk Bank بىرنەشە جىل بويى گازداندىرۋ ماسەلەسىن شەشۋگە ءوز رەسۋرستارىن سالۋدا: «ءبىز قازاقستاندىقتاردىڭ ءومىر ءسۇرۋ ساپاسىن ارتتىرۋ ءۇشىن بانك قىزمەتتەرىن جەتىلدىرۋ ارقىلى دا، بۇكىل رەسپۋبليكا بويىنشا الەۋمەتتىك جوبالاردى ىسكە اسىرۋ ارقىلى دا ۇنەمى جۇمىس ىستەپ كەلەمىز. 2021 جىلى بانك الماتىدا جالپى سوماسى 92 ملن تەڭگەگە 100 جەكە ءۇيدى تولىقتاي گازداندىرۋدى قارجىلاندىردى، سونداي-اق تۇرعىن ۇيلەرگە گاز جۇرگىزۋگە جەڭىلدىكپەن نەسيە بەرۋدىڭ جەكە باعدارلاماسىن ىسكە قوستى. گازداندىرۋ جوباسىن جالعاستىرا جانە كەڭەيتە وتىرىپ، ءبىز بىردەن ەكى مىندەتتى – وتانداستارىمىزدىڭ نەعۇرلىم وسال توپتارىنا كومەكتەسۋگە جانە ەلدەگى ەكولوگيالىق جاعدايدى جاقسارتۋعا بارىنشا ۇلەس قوسۋعا تىرىسامىز».
قازاقستاننىڭ بارلىق ايماقتارى ءۇشىن گازداندىرۋ ماسەلەسى وزەكتى كۇيىندە قالىپ وتىر. جىل باسىندا ۇكىمەت وتىرىسىندا پرەمەر-مينيستر ءاليحان سمايىلوۆ مەملەكەت باسشىسىنىڭ ەلدەگى گازداندىرۋ دەڭگەيىن 60 پايىزعاجەتكىزۋ تۋرالى تاپسىرماسىن ەسكە سالدى. ول ءۇشىن 11،8 ميلليوننان استام تۇرعىنى بار 1800-دەن استام ەلدى مەكەن گازداندىرىلۋى ءتيىس. بانك مەملەكەتتىڭ، بيزنەستىڭ جانە ازاماتتاردىڭ بىرلەسكەن جانە جان-جاقتى كۇش-جىگەرى قازاقستاندىقتاردىڭ ءومىر ءسۇرۋ ساپاسىن جاقسارتۋعا، وڭ وزگەرىستەرگە اكەلەتىنىنە سەنىمدى.