Almaty-akshamy.kz سايتىنىڭ بۇگىنگى جاڭالىقتارىنا شولۋ – كۇن كەرۋەنى
الماتى الاڭىندا – ادامزات بولاشاعى
بۇگىن الماتىدا Digital Almaty 2024 فورۋمى باستالدى. جيىندا سيفرلىق ترانسفورماسيانىڭ جاڭا باعىتى تالقىلانادى، سيفرلىق تەحنولوگيالار سالاسىنداعى جارىققا شىققان تىڭ دۇنيەلەر كورمەگە قويىلادى. سيفرلى بولاشاقتا قانداي مامانداردى دايىنداۋ كەرەكتىگىنەن تارتىپ، ونەركاسىپتى، ۇكىمەت جۇمىسىن، الەۋمەتتىك قىزمەت كورسەتۋ سالالارىن سيفرلاندىرۋدىڭ وتاندىق جانە شەتەلدىك تاجىريبەلەرى، ستراتەگيالارى ءسوز بولادى.
الماتىدان 252 شاقىرىمدا جەر سىلكىندى
ق ر توتەنشە جاعدايلار مينيسترلىگى 1 اقپان كۇنى ساعات 01:21-دە جەر سىلكىنىسىن (افتەرشوك) تىركەدى. سىلكىنىس وشاعى الماتىدان وڭتۇستىك-شىعىسقا قاراي 252 شاقىرىم قاشىقتىقتا - جۇڭگو اۋماعىندا ورنالاسقان.
جۇلدەلى جەتكىنشەكتەر
الماتىلىق وقۋشىلار 25-28 قاڭتار ارالىعىندا ءۇندىستاننىڭ گوا قالاسىندا روبوتوتەحنيكادان وتكەن «The Goa International Robotics Festival» حالىقارالىق اشىق چەمپيوناتىنان جۇلدەلى ورالدى. دوداعا 220 كوماندا قاتىسقان. ءۇش كۇندىك جارىستىڭ قورىتىندىسى بويىنشا الماتى قالاسىنان بارعان «Sana team» جانە «Qazaq style» قۇراما كوماندالارى ەكى جوعارى ناگرادامەن ماراپاتتالدى.
100 دوللار جارىلقاي ما؟
"ۇلتتىق قور - بالالارعا" باعدارلاماسى بويىنشا بجزق-عا العاشقى جيناقتار ءتۇستى. الەۋمەتتىك جەلىلەردىڭ باستى تاقىرىبىنا اينالعان 100 دوللار قىزۋ تالقىعا ءتۇسىپ جاتىر. كوپشىلىك بۇل اقشانى اي سايىن تولەنەدى دەپ دامەلەنىپ قالعان سىڭايلى.
باعدارلاماعا قاتىسۋشىلاردىڭ جالپى سانى - 6 919 131 بالا. ولارعا قازاقستان ۇلتتىق قورىنىڭ وتكەن جىلعى تابىسىنان 100 اقش دوللارى جانە 52 سەنتى مولشەرىندە بىردەي سوما ەسەپتەلدى.
بالانىڭ باعدارلاماعا قاتىسۋى تۋرالى جانە ەسەپتەلگەن نىسانالى تالاپتار تۋرالى اقپاراتتى كامەلەتكە تولماعان بالانىڭ اتا-اناسى (نەمەسە باسقا دا زاڭدى وكىلدەرى) ارنايى اشىلعان kids.enpf.kz سايتىندا (بالانىڭ جسن بويىنشا) تەكسەرە الادى. مۇندا ءسىز، سونداي-اق، باعدارلامانىڭ شارتتارىمەن، نۇسقاۋلىقپەن تانىسىپ، ءوزىڭىزدى قىزىقتىرعان ساۋالدارعا جاۋاپ الا الاسىز. اتا-انالار ءوز بالالارى بويىنشا ەسەپتەلگەن قارجى تۋرالى دەرەكتەردى egov.kz پورتالىنداعى جەكە كابينەتىندە تەكسەرە الادى.
انگەلينا لۋكاس – الەم چەمپيونى!
قازاقستاندىق بوكسشى انگەلينا لۋكاس باكۋدە وتكەن كاسىپقوي بوكس كەشىندە ونەر كورسەتىپ، پاكىستاندىق سپورتشىنى ءبىرىنشى راۋندتا نوكاۋتپەن جەڭىپ، WIBA الەم تيتۋلىن يەلەندى. بۇعان دەيىن لۋكاس WBC International جانە UBO چەمپيوندىق بەلبەۋلەرىن دە جەڭىپ العان بولاتىن.
مۋزەيدەن دە كەتتى
بۇرىنعى پرەزيدەنت نۇرسۇلتان نازاربايەۆقا ارنالعان ەسكەرتكىش ۇلتتىق مۋزەي اتريۋمىنان الىنىپ تاستالدى. مۇراجاي شىلدە ايىندا مەرەيتويىن اتاپ وتەتىن ۇلتتىق مۋزەيدىڭ 10 جىلدىعىن مەرەكەلەۋ اياسىندا مادەنيەت جانە اقپارات ءمينيسترىنىڭ تاپسىرماسى بويىنشا 2024 جىلى وتاندىق جانە شەتەلدىك ساراپشىلاردى تارتا وتىرىپ، مۇراجاي كەڭىستىگىن جەتىلدىرۋ پروسەسى باستالعانىن ءتۇسىندىردى.
تەلەفون ۇستاۋعا تىيىم سالىنا ما؟
وقۋشىلارعا ساباق ۋاقىتىندا تەلەفون ۇستاۋعا زاڭدى تۇردە تىيىم سالۋ ءبىلىم بەرۋ ساپاسىنا سەرپىلىس اكەلەدى. ال وقۋشىلار تەلەفونىن مەكتەپتەگى ارنايى جاشىكتە نەمەسە سومكەسىندە ساقتاي الادى.
ادامنان ايلا ارتىلماس
كاسىپكەرلىك سيپاتتاعى ارەكەتتەردى انىقتاۋ ماقساتىندا كىرىس كوميتەتى بانكتەردەن مالىمەت الاتىنى بەلگىلى بولعاننان كەيىن كەيبىر دۇكەن يەلەرى تۇتىنۋشىلارعا اقشانى تەلەفون بالانىسىنا جىبەرۋدى سۇراپ جاتقانعا ۇقسايدى.
قارجى ۆيسە-مينيسترى ەرجان ءبىرجانوۆتىڭ ويىنشا، بۇل ۋاقىتشا ارەكەت. قاجەت بولعان جاعدايدا ۇيالى وپەراتورلار ارقىلى باقىلاۋ جۇرگىزىلەدى.
تاعى ءبىر مەرەكە
بۇگىن ەلىمىزدە العاش رەت ازاماتتىق اۆياسيا قىزمەتكەرلەرىنىڭ مەرەكەسى اتاپ ءوتىلدى. بۇل كاسىبي مەرەكە – قازاقستان رەسپۋبليكاسىنىڭ ازاماتتىق اۆياسياسى سالاسىنداعى قىزمەتكە ەرەكشە ءمان بەرۋگە جانە ەلىمىزدىڭ جاس اۆياتورلارىنىڭ پاتريوتتىق رۋحىن دامىتۋعا ىنتالاندىرۋعا ارنالعان.