قازاقستاندىق بوكسشىلار بولگارياداعى ءداستۇرلى «ستراندجا» تۋرنيرىنە قاتىسۋدا، دەپ حابارلايدى almaty-akshamy.kz
وسىمەن 73ء-شى رەت تۇساۋىن كەسكەن حالىقارالىق دوداعا 36 ەلدەن 500-گە جۋىق قاتىسۋشى جينالدى. ولاردىڭ اراسىندا جەرلەستەرىمىز دە بار. جارىستىڭ العاشقى كۇنى 15 قازاقستاندىق سپورتشى شارشى الاڭعا شىقتى. ونىڭ 10-ى جەڭىسكە جەتىپ، كەلەسى كەزەڭگە جولداما الدى.
اتاپ ايتقاندا، جەڭىل سالماقتاعى ماحمۇت سابىرحان گەرمانيالىق قارسىلاسىن ايقىن باسىمدىقپەن ۇتتى. ءدال وسىلاي ورتا سالماقتاردا ورازبەك اسىلقۇلوۆ، مۇحاممەدسابىر بازارباي ۇلى، ابزال سەرىك ، دۋلات بەكباۋوۆ جانە قۋان قۋاتوۆ جەڭىسكە جەتتى. اۋىر سالماقتاعى ەراسىل جاقپەكوۆ ، ساعىندىق توعامباي، ابزال قۇتتىبەكوۆ جانە نۇرلان ساپارباي دا جارىستى جالعاستىرادى.
سوفيا قالاسىنداعى ءتۋرنيندىڭ جالپى قورىتىندىسى 29 اقپاندا بەلگىلى بولادى.