2023-2024 وقۋ جىلىندا ءبىرىنشى سىنىپقا 30 مىڭنان استام بالا باردى. قالا مەكتەپتەرىندەگى سالتاناتتى جيىنعا الماتى قالاسى اكىمىنىڭ ورىنباسارلارى اسەم ءنۇسىپوۆا، ارمان قىرىقبايەۆ، الىشەر ءابدىقادىروۆ، سونداي-اق، اۋدان اكىمدەرى جانە ت. ب. قاتىستى.
ءبىلىم كۇنى الماتىدا 323 مەكتەپ ەسىگىن ايقارا اشتى، ونىڭ ىشىندە 215 –مەملەكەتتىك جانە 108 – جەكەمەنشىك. ونىڭ ىشىندە، تۇركسىب اۋدانى، قايرات شاعىناۋدانىنداعى №211 مەملەكەتتىك جاڭا مەكتەپ جانە 3000 ورىندىق 9 جەكەمەنشىك مەكتەپ بار. سونداي - اق، بۇگىنگى تاڭدا 2 مەكتەپتە (№48، شي №9) قوسىمشا عيماراتتاردىڭ قۇرىلىسى اياقتالدى، بۇل وقۋشىلار سانىن 420 ورىنعا ارتتىرۋعا مۇمكىندىك بەردى. سونداي-اق، جىل سوڭىنا دەيىن №148 300 ورىندىق مەكتەپكە قوسىمشا قۇرىلىستى اياقتاۋ جوسپارلانۋدا. قالا مەكتەپتەرىندە بارلىعى 301 مىڭنان استام وقۋشى وقيدى.
بيىل الماتى اكىمى ەربولات دوسايەۆتىڭ تاپسىرماسى بويىنشا 133 مىڭنان استام باستاۋىش سىنىپ وقۋشىلارى تەگىن ىستىق تاماقپەن قامتاماسىز ەتىلەدى. ال جەرگىلىكتى بيۋدجەتتەن قارجىلاندىرىلاتىن "جالپىعا بىردەي وقىتۋ" قورىنان كومەك سوماسى مەكتەپ فورماسى مەن كەڭسە كەرەك-جاراقتارىن ساتىپ الۋ ءۇشىن ءبىر بالاعا 43 مىڭ تەڭگەنى قۇرادى. وسى قوردان ءحاوت ساناتىنداعى (حالىقتىڭ الەۋمەتتىك وسال توپتارى) 15 مىڭنان استام الماتىلىق وقۋشى كومەك الدى.
سونداي-اق، جاڭا وقۋ جىلىندا قالا اكىمى ەربولات دوسايەۆتىڭ تاپسىرماسى بويىنشا الماتىدا العاش رەت مەكتەپ جاسىنداعى بالالاردى تۇرعىلىقتى جەرىنەن وقۋ ورنىنا جانە كەرى قاراي تەگىن تاسىمالداۋ ءۇشىن مەكتەپ اۆتوبۋستارىن ۇسىنۋ بويىنشا اۋقىمدى جوبا ەنگىزىلدى. «مەكتەپ اۆتوبۋسى» جوباسى 30 مەملەكەتتىك مەكتەپتى قامتيدى.
ول باستاۋىش سىنىپ وقۋشىلارىنا جانە مەكتەپتەن الىس تۇراتىن وقۋشىلارعا باعىتتالعان. وسى ماقساتتا كوممۋنالدىق اۆتوپارك الماتى قالاسىنىڭ ءبىلىم باسقارماسىمەن بىرلەسىپ 100 مەكتەپ اۆتوبۋسىن ساتىپ الدى. بۇل اۆتوبۋستار حالىقارالىق قاۋىپسىزدىك ستاندارتتارىنا جانە تەحنيكالىق تالاپتارعا سايكەس كەلەدى: اۆاريالىق شىعۋ، قاۋىپسىزدىك بەلدىكتەرى، مۇمكىندىگى شەكتەۋلى بالالارعا ارنالعان پاندۋس، ءورت قاۋىپسىزدىگى جۇيەسى جانە ت.ب. بالالاردى تاسىمالداۋ پەداگوگتىڭ قاتىسۋىمەن جانە بالالاردى تاسىمالداۋدىڭ ازىرلەنگەن ەرەجەلەرىنە سايكەس جۇزەگە اسىرىلاتىن بولادى.
