ەلىمىزدە جىل باسىنان بەرى قارجى پيراميدالارىمەن بايلانىسى بار 9 مىڭعا جۋىق سايت پەن اككاۋنت بۇعاتتالعان.
25 قارجى پيراميداسى جويىلىپ، جابىرلەنۋشىلەرگە 8،3 ملرد تەڭگە قايتارىلدى، دەپ حابارلايدى Almaty-akshamy.kz.
مۇنى پرەزيدەنت قابىلداۋىندا بولعان قارجىلىق مونيتورينگ اگەنتتىگىنىڭ ءتوراعاسى جانات ەليمانوۆ مالىمدەدى. سونداي-اق قارجىلىق بارلاۋ قىزمەتى ەسىرتكى ساتاتىن 15 ينتەرنەت-دۇكەندى اشكەرەلەگەن. ولاردىڭ جالپى ساۋدا اينالىمى 4،4 ملرد تەڭگە بولىپتى.
بۇل ماتەريالدار ىشكى ىستەر مينيسترلىگى مەن ۇلتتىق قاۋىپسىزدىك قىزمەتىنە جولدانعان. جانات ەليمانوۆ 25 ۇيىمداسقان قىلمىستىق توپتىڭ جولى كەسىلىپ، 300 ملرد تەڭگەدەن استام اكتيۆ قايتارىلعانىن دا ايتتى. ال اقشانى قولما-قول شىعارۋمەن اينالىساتىن 119 توپتىڭ قىزمەتىنە توسقاۋىل قويىلعان.
مەملەكەت باسشىسى الاياقتىق ارەكەتتەرى مەن قارجى پيراميدالارىنىڭ جولىن كەسۋ بويىنشا جۇمىستى جالعاستىرۋدى تاپسىردى.