اۋىلداعى مەديسينانى جاقسارتۋ ماسەلەسى تالقىلاندى
دەنساۋلىق ساقتاۋ مينيسترلىگى 1 شىلدەدەن باستاپ بارلىق اۋىلدا مەديسينالىق تەكسەرىس ۇيىمداستىرۋدى جوسپارلاپ وتىر. بۇل تۋرالى دەنساۋلىق ساقتاۋ ءمينيسترى اجار عينيات اۋداندار مەن مونوقالالاردىڭ باس دارىگەرلەرىمەن وتكەن كەزدەسۋدە ايتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ءمينيستردىڭ ايتۋىنشا، اۋىلدا مەديسينالىق كومەكتىڭ قولجەتىمدىلىگىن قامتاماسىز ەتۋ، اۋىل حالقىنىڭ ءومىر ءسۇرۋ ساپاسىن ارتتىرۋ دەنساۋلىق ساقتاۋ ساياساتىنىڭ باستى باسىمدىعى بولىپ قالا بەرەدى.
"نەگىزگى مەديسينالىق، ينفراقۇرىلىمدىق، تەحنولوگيالىق رەسۋرستار قالالاردا شوعىرلانعان. ال اۋىل تۇرعىندارى بىلىكتى مەديسينالىق قىزمەت، مامانداندىرىلعان كومەك الۋدا ءالى دە قيىندىقتارعا تاپ بولۋدا. ءبىزدىڭ ورتاق مىندەتىمىز – ءاربىر ءومىر ءۇشىن كۇرەسۋ، ادام قاي جەردە تۇرسا دا، ول ءبىزدىڭ پاسيەنت بولىپ قالا بەرەدى، ال دارىگەر وعان ەڭ قاجەتتى كومەك كورسەتۋگە ءتيىس"، - دەدى عينيات.
ول كوپتەگەن پروبلەما جىلدار بويى شەشىلمەي، بۇگىندە دەنساۋلىق ساقتاۋ سالاسىنا ۇلكەن جۇكتەمە ءتۇسىرىپ جاتقانىن ايتتى. بۇل كادر تاپشىلىعى، مەديسينالىق وبەكتىلەردىڭ توزۋى، جول-كولىك قاتىناسىنىڭ السىزدىگى، اۋىلدا مەديسينالىق تەحنيكامەن جاراقتاندىرۋدىڭ تومەندىگى.
ءمينيستردىڭ ايتۋىنشا، اۋىل تۇرعىندارى امبۋلاتوريالىق مەكەمەلەرگە سيرەك بارادى، تەك دەنساۋلىعى ناشارلاعان جاعدايدا عانا اۋرۋحاناعا جاتادى. ويتكەنى تۇرمىستىق سيپاتتاعى قيىندىقتارعا بايلانىستى جوسپارلى ەمدەۋدەن باس تارتادى.
"وسىعان بايلانىستى مينيسترلىك اۋىل تۇرعىندارىن باستاپقى دياگنوستيكامەن قامتۋدى ارتتىرۋعا باعىتتالعان ءبىرقاتار ءىس-شارانى ىسكە اسىرىپ جاتىر. ول ءۇشىن بارلىق جاستاعى اۋىل تۇرعىندارىنا پروفيلاكتيكالىق تەكسەرۋ جۇرگىزۋ تۋرالى بۇيرىقتىڭ جوباسى ازىرلەندى. ونى 1 شىلدەدەن باستاپ ىسكە قوسۋ جوسپارلانىپ وتىر"، - دەپ حابارلادى دەنساۋلىق ساقتاۋ مينيسترلىگىنىڭ باسپا ءسوز قىزمەتى.
بۇدان باسقا، اۋىلدا مەديسينالىق كومەكتىڭ قولجەتىمدىلىگىن جاقسارتۋ ءۇشىن دەنساۋلىق ساقتاۋ ۇيىمدارى جەلىسىنىڭ مەملەكەتتىك ءنورماتيۆى، مەديسينالىق كومەك كورسەتۋ ستاندارتتارى قايتا قارالادى، كولىك مەديسيناسىنىڭ ارسەنالى كۇشەيتىلەدى.
مينيستر جەرگىلىكتى اتقارۋشى ورگانداردى، اۋداندىق دەڭگەيدەگى اۋرۋحانالار مەن مونوقالالاردىڭ باس دارىگەرلەرىن، دەپۋتاتتىق كورپۋستى اۋىلداعى مەديسينا پروبلەمالارىن بىرلەسىپ شەشۋگە شاقىردى.