بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى بويىنشا مەملەكەتتىك كىرىستەر دەپارتامەنتى وندىرىستىك ەمەس تولەمدەر باسقارماسىنىڭ باسشىسى قۋانىش تۇمەنبايەۆ مالىمدەدى، دەپ حابارلايدى اlmaty-akshamy.kz.
2023 جىلدىڭ 1 ساۋىرىنە دەيىن كولىك يەلەرىنىڭ ءبارى مىندەتتى تۇردە وتكەن جىل ءۇشىن سالىق تولەۋلەرى كەرەك ەكەنىن ەسكە سالامىز. تولەم ۋاقتىلى جاسالماعان جاعدايدا، ءاربىر كەشىكتىرىلگەن كۇن ءۇشىن قايتا قارجىلاندىرۋدىڭ رەسمي ستاۆكاسىنىڭ 1،25 ەسەلەنگەن مولشەرىندە ءوسىمپۇل الىنادى.
«بورىشكەرگە 30 جۇمىس كۇنى ىشىندە بەرەشەكتى وتەۋ تۋرالى حابارلاما جىبەرىلەدى. حابارلاندىرۋ مەرزىمى وتكەننەن كەيىن بەرەشەك سوماسى 1 اەك-تەن اساتىن بولسا، بورىشكەرگە 5 جۇمىس كۇنى ىشىندە بەرەشەكتى ءوندىرىپ الۋ تۋرالى سالىق بۇيرىعى جىبەرىلەدى»، - دەدى سپيكەر.
سپيكەر اتاپ وتكەندەي، بورىشكەرلەرگە سوت ورىنداۋشىلارى تاراپىنان ودان ءارى ماجبۇرلەۋ شارالارى قولدانىلادى، ونىڭ ىشىندە مۇلكى مەن بانك شوتتارىنا تىيىم سالۋدان باستاپ، ونىڭ ىشىندە ەلدەن تىس جەرلەرگە شىعۋىنا شەكتەۋ قويىلادى. بۇل رەتتە قارىز سوماسىنا قوسىمشا نەگىزگى قارىز سوماسىنىڭ 25%-عا دەيىنگى مولشەرىندە سوت شىعىندارى الىنادى. سونداي-اق بورىشكەرلەر بانكتىك قىزمەتتەردى الا المايدى، ونىڭ ىشىندە بانك شوتتارىن اشۋ، اقشا اۋدارۋ، نەسيە الۋ جانە ت.ب.
سالىق سوماسىن e-Salyk-Azamat ءموبيلدى قوسىمشاسى ارقىلى نەمەسە مەملەكەتتىك كىرىستەر كوميتەتىنىڭ www.kgd.kz ينتەرنەت-رەسۋرسىندا ەسەپتەپ، تولەۋگە بولادى.
«كولىك سالىعىن e-Salyk-Azamat ءموبيلدى قوسىمشاسى ارقىلى تولەۋگە بولادى. قوسىمشادا تولەمدى جۇزەگە اسىرۋعا بولاتىن «سالىق ءاميانى» قىزمەتى بار. سونىمەن قاتار، بۇل قوسىمشا دايىن رەكۆيزيتتەردى پايدالانا وتىرىپ، ءبىر ۋاقىتتا تولەمدەردى جۇزەگە اسىرۋ مۇمكىندىگىمەن «الداعى تولەمدەر» سەرۆيسىندە ەسەپتەلگەن سالىق سوماسىن بىلۋگە مۇمكىندىك بەرەدى»، - دەپ ءبولىستى سپيكەر.
سالىق تولەمدەرىن ەكىنشى دەڭگەيلى بانكتەردىڭ، «قازپوشتا» اق فيليالدارىندا نەمەسە ەكىنشى دەڭگەيلى بانكتەردىڭ ءموبيلدى قوسىمشالارى ارقىلى دا تولەۋگە بولادى. سونىمەن قاتار، باسقارما سالىقتى كولىك قۇرالى يەسىنىڭ تۇرعىلىقتى جەرى بويىنشا تولەيتىنىن ەسكە سالدى.
اگەنتتىكتىڭ مالىمەتىنشە، 2023 جىلعى 1 قاڭتارداعى جاعداي بويىنشا الماتىدا 441 221 جەكە تۇلعانىڭ اتىنا تىركەلگەن 709 944 كولىك بار. 2022 جىلعا ەسەپتەلگەن سالىقتىڭ جالپى سوماسى 16،6 ملرد تەڭگەنى قۇرايدى.