ەڭبەك جانە حالىقتى الەۋمەتتىك قورعاۋ مينيسترلىگى 2026 جىلى ەلىمىزدە زەينەتاقىلار مەن جاردەماقىلار قانشا پايىزعا وسەتىنىن مالىمدەدى، دەپ حابارلايدى aqshamnews.kz
2026–2028 جىلدارعا ارنالعان رەسپۋبليكالىق بيۋدجەت تۋرالى زاڭعا سايكەس، 2026 جىلعى 1 قاڭتاردان باستاپ ۇلتتىق بانك ايقىندايتىن بولجامدى ينفلياسيا دەڭگەيىنە ساي مەملەكەتتىك جاردەماقىلاردىڭ بارلىق ءتۇرى، بازالىق جانە ىنتىماقتى زەينەتاقىلار 10%-عا ۇلعايتىلادى.
سونىمەن قاتار مەملەكەت باسشىسىنىڭ تاپسىرماسىنا سايكەس، 2023 جىلدان باستاپ بەس جىل بويى ەڭ تومەنگى بازالىق زەينەتاقى مولشەرىن كۇنكورىس دەڭگەيىنىڭ 70%-ىنا دەيىن، ال ەڭ جوعارى مولشەرىن 120%-ىنا دەيىن كەزەڭ-كەزەڭىمەن جىل سايىن ارتتىرۋ جۇزەگە اسىرىلىپ كەلەدى.
وسىلايشا، 2026 جىلعى 1 قاڭتاردان باستاپ بازالىق زەينەتاقىنىڭ ەڭ تومەنگى مولشەرى 35 596 تەڭگەنى (كۇنكورىس دەڭگەيىنىڭ 70%-ى) قۇرايدى. ال ەڭ جوعارى مولشەرى كۇنكورىس دەڭگەيىنىڭ 110%-ىنان 118%-ىنا دەيىن ءوسىپ، 60 005 تەڭگەگە جەتەدى.
ماسەلەن، 2019 جىلى زەينەتكە شىققان 70 جاستاعى زەينەتكەرگە 2025 جىلى بيۋدجەتتەن تولەنگەن زەينەتاقى مولشەرى 171 588 تەڭگە بولدى، ونىڭ ىشىندە بازالىق زەينەتاقى تولەمى – 50 851 تەڭگە، ىنتىماقتى زەينەتاقى – 120 737 تەڭگە.
2026 جىلعى 1 قاڭتاردان باستاپ بولاتىن ءوسىمدى ەسكەرگەندە، بۇل زەينەتكەردىڭ جالپى زەينەتاقىسى 192 816 تەڭگەگە دەيىن ۇلعايادى، ونىڭ ىشىندە بازالىق زەينەتاقى – 60 005 تەڭگە، ىنتىماقتى زەينەتاقى – 132 811 تەڭگە بولادى. ايتا كەتۋ كەرەك، كورسەتىلگەن سومالارعا ءبىرىڭعاي جيناقتاۋشى زەينەتاقى قورىنان (بجزق) تولەنەتىن تولەمدەر كىرمەيدى.
2026 جىلعى 1 قاڭتاردان باستاپ مەملەكەتتىك جاردەماقىلار مولشەرىنىڭ وسۋىنە قاتىستى بىرنەشە مىسال:
1، 2، 3-بالا دۇنيەگە كەلگەندە تولەنەتىن جاردەماقى 149 416 تەڭگەدەن 164 350 تەڭگەگە دەيىن، ال 4 جانە ودان دا كوپ بالا تۋعان جاعدايدا – 247 716 تەڭگەدەن 272 475 تەڭگەگە دەيىن ۇلعايادى.
بالالار سانىنا بايلانىستى بەلگىلەنەتىن كوپبالالى وتباسىلارعا ارنالعان جاردەماقى 4 بالاسى بار وتباسىلار ءۇشىن 63 030 تەڭگەدەن 69 330 تەڭگەگە دەيىن، ال 10 بالاسى بار وتباسىلار ءۇشىن 157 280 تەڭگەدەن 173 000 تەڭگەگە دەيىن وسەدى.
I توپتاعى مۇگەدەكتىگى بار ادامدارعا ارنالعان جاردەماقى 101 702 تەڭگەدەن 111 872 تەڭگەگە دەيىن، II توپ ءۇشىن – 81 362 تەڭگەدەن 89 498 تەڭگەگە دەيىن، III توپ ءۇشىن – 55 474 تەڭگەدەن 61 021 تەڭگەگە دەيىن ارتتىرىلادى.
سونداي-اق مەملەكەتتىك الەۋمەتتىك ساقتاندىرۋ قورىنان (ءماسق) اسىراۋشىسىنان ايىرىلۋ جانە ەڭبەككە قابىلەتتىلىگىنەن ايىرىلۋ جاعدايلارى بويىنشا تولەنەتىن الەۋمەتتىك تولەمدەر دە 10%-عا كوبەيتىلەدى. بۇل تولەمدەر مەملەكەتتىك بيۋدجەتتەن بەرىلەتىن جاردەماقىلارعا قوسىمشا تۇردە، مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا تولەنەدى.
تولەمدەردىڭ مولشەرى ءار ادام ءۇشىن جەكە ەسەپتەلەدى جانە سوڭعى ەكى جىلدا ءماسق-قا الەۋمەتتىك اۋدارىمدار جۇرگىزىلگەن ورتاشا ايلىق تابىسقا، ەڭبەككە قابىلەتتىلىگىنەن ايىرىلۋ كوەففيسيەنتتەرىنە، اسىراۋىنداعى ادامدار سانىنا، مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە تابىستى الماستىرۋ دەڭگەيىنە بايلانىستى بولادى.