اۋىلدىڭ الەۋەتى كوتەرىلمەك
قازاقستاندا 1 ملن اۋىل تۇرعىنىنىڭ تابىسىن ارتتىرۋ جوسپارلانۋدا، دەپ حابارلايدى Almaty-akshamy.kz.
بۇل - اگروونەركاسىپتى كەشەندى دامىتۋدىڭ 2021-2025 جىلدارعا ارنالعان ۇلتتىق جوباسىندا كوزدەلگەن ماقسات.
قۇجاتتى ۇكىمەت وتىرىسىندا ق ر اۋىل شارۋاشىلىعى ءمينيسترى ەربول قاراشوكەيەۆ تانىستىردى.
مينيستر ءمالىم ەتكەندەي، ۇلتتىق جوبانى ازىرلەۋ كەزىندە اگروونەركاسىپتىك كەشەندى دامىتۋداعى جاھاندىق سىن-قاتەرلەر مەن الەمدىك ترەندتەر، الدىڭعى مەملەكەتتىك جانە سالالىق باعدارلامالاردى ىسكە اسىرۋ قورىتىندىلارى ەسكەرىلگەن.
«ۇلتتىق جوبانىڭ مىناداي نەگىزگى مىندەتتەرى ايقىندالدى: ەڭبەك ونىمدىلىگىن 2،5 ەسە ارتتىرۋ، وتاندىق ءوندىرىستىڭ نەگىزگى ازىق-تۇلىك تاۋارلارىمەن قامتاماسىز ەتىلۋى، وڭدەلگەن ءونىم ۇلەسىن 70% دەيىن جەتكىزە وتىرىپ اگروونەركاسىپتىك كەشەن ونىمدەرىنىڭ ەكسپورتىن 2 ەسەگە ۇلعايتۋ، 7 ءىرى ەكوجۇيە قالىپتاستىرۋ جانە ينۆەستيسيالىق جوبالاردى ىسكە اسىرۋ ەسەبىنەن 1 ملن اۋىل تۇرعىنىنىڭ تابىسىن تۇراقتى ارتتىرۋ»، - دەدى ق ر اۋىل شارۋاشىلىعى ءمينيسترى ەربول قاراشوكەيەۆ.
سونداي-اق مينيستر ۇلتتىق جوبانى ىسكە اسىرۋدا 4،1 ترلن تەڭگەگە 582 ينۆەستيسيالىق جوبانى ىسكە قوسۋ جوسپارلانىپ وتىرعانىن اتاپ ايتتى.