قالادا 8 رەفەرەندۋم كوميسسياسى قىزمەت ەتەدى جانە 574 رەفەرەندۋم ۋچاسكەسى تاعايىندالعان.
تەلەگرامم-كانالىندا ارنايى بوت اشىلعان، ول جەردە جسن ەنگىزۋ ارقىلى ۋچاسكەڭىزدى بىلە الاسىز، دەپ حابارلايدى Almaty-akshamy.kz
بۇل تۋرالى الماتى قالاسى وڭىرلىك كوممۋنيكاسيا الاڭىندا رەسپۋبليكالىق رەفەرەندۋمعا دايىندىق تاقىرىبىندا وتكەن بريفينگتە ايتىلدى.
الماتى قالالىق رەفەرەندۋم كوميسسياسىنىڭ ءتورايىمى جاننا اسانوۆا قالادا 8 رەفەرەندۋم كوميسسياسى قىزمەت ەتەتىنىن جانە 574 رەفەرەندۋم ۋچاسكەسى تاعايىندالعانىن مالىمدەدى. 4938 ادام رەفەرەندۋم ۋچاسكەسىندە جۇمىس ىستەيدى، ال اۋداندىق كوميسسيالاردا 62 ادام بار. جالپى العاندا 5 مىڭ ادام كوميسسيا مۇشەسى رەتىندە رەفەرەندۋم ناۋقانىنا قاتىسادى ەكەن.
20 مامىردان باستاپ ۋچاسكەلىك سايلاۋ كوميسسيالارى ءوز قىزمەتتەرىن باستادى. ءقازىر جۇرتشىلىق تاراپىنان «ۋچاسكەمدى قالاي تابامىن، تىزىمنەن ءوزىمدى قالاي تابامىن؟» دەگەن سۇراقتار كوپ. ول ءۇشىن ارنايى بايلانىس ورتالىعى اشىلدى. ەستىمەگەن ادامدار بولسا 338-45-45 نومىرىنە حابارلاسىپ سۇراقتارىنا جاۋاپ الا الادى. ودان بولەك تەلەگرامم-كانالىندا ارنايى بوت اشىلعان، ول جەردە جسن ەنگىزۋ ارقىلى ۋچاسكەڭىزدى بىلە الاسىز. ەگەر رەفەرەندۋمعا قاتىسۋعا قۇقىعى بار ازاماتتار تىزىمىنەن ءوزىڭىزدى تاپپاساڭىز، ارنايى بايلانىس تەلەفون نومىرىنە قوڭىراۋ شالىپ، انىقتاۋعا بولادى،-دەدى ول.
الماتى قالالىق رەفەرەندۋم كوميسسياسى ءتورايىمىنىڭ ورىنباسارى ايگۇل قالىقوۆانىڭ ايتۋىنشا رەفەرەندۋمعا قاتىساتىن ازاماتتار ءتىزىمى الدىن الا جاسالعان. 20 مامىرداعى جاعداي بويىنشا 1 ملن 100 مىڭنان استام ادام رەفەرەندۋمعا قاتىسۋ قۇقىعىنا يە ەكەن.
ەگەر رەفەرەندۋم كەزىندە ازامات قالادا بولمايتىن بولسا، ول الدىن الا جەرگىلىكتى ۋچاسكەسىنەن تىركەۋ كۋالىگىن الا الادى. ونىمەن ەلىمىزدىڭ كەز كەلگەن جەرىندە رەفەرەندۋمعا قاتىسا الادى. تەك الماتىداعى وزگە اۋدانداردا قاتىسا المايدى، ياعني بوستاندىق اۋدانىندا تىركەۋدە بولسا، جەتىسۋ اۋدانىنا بارىپ داۋىس بەرە المايدى. مىندەتتى تۇردە ءوز اۋدانىنا بارۋ كەرەك. اۋىرىپ جاتقان نەمەسە اۋىرىپ جاتقان ادامعا قاراپ شىعا الاماي وتىرعاندار ۇيگە تاپسىرىس بەرە الادى. ونداي وتىنىشتەر 20 مامىردان 5 ماۋىسىمعا دەيىن قابىلدانادى،-دەدى قالىقوۆا.