ەنەرگەتيكا مينيسترلىگىنىڭ وكىلدەرى ۇسىنعان اقپاراتقا سايكەس، مامىر ايىندا ەنەرگيا ءوندىرۋشى ۇيىمداردىڭ ەلەكتر ەنەرگياسىن وندىرۋگە ارنالعان شەكتى تاريفتەرىن قايتا قاراۋ جوسپارلانىپ وتىر.
ەنەرگەتيكا مينيسترلىگىنىڭ مالىمەتىنشە، 47 ەنەرگيا ءوندىرۋشى ۇيىمنىڭ 27ء-سى شەكتى تاريفتەردى تۇزەتۋگە ءوتىنىم بەرگەن. 20 ەنەرگيا ءوندىرۋشى ۇيىم ءۇشىن تاريف بۇرىنعى دەڭگەيدە ساقتالاتىن بولادى، دەپ حابارلايدى Almaty-akshamy.kz Egemen.kz-كە سىلتەمە جاساپ.
باعانىڭ قىمباتتاۋىنا جوندەۋ جۇمىستارىنا قاجەت ماتەريالدار مەن جابدىقتار قۇنىنىڭ ءوسۋى سەبەپ بولىپ وتىر.
ەلىمىزدەگى ەنەرگيا ءوندىرۋشى ۇيىمدارىنىڭ گەنەراسيالاۋشى قۋاتتارىنىڭ جارتىسىنان كوبىنىڭ توزىعى جەتكەن. ءتىپتى كەيبىرەۋى ىستەن شىعىپ قالۋدىڭ از-اق الدىندا تۇر. ماسەلەن، ستەپنوگور جەو-نىڭ توزۋ دەڭگەيى - 82 پايىز، ريددەر جەو - 75 پايىز، ورال جەو - 86 پايىز. 90 پايىزعا دەيىن توزىپ كەتكەن جەو-لار دا بار.
سونداي-اق ق ر ەنەرگەتيكا مينيسترلىگى مەملەكەت باسشىسى قاسىم-جومارت توقايەۆتىڭ تاپسىرماسى شەڭبەرىندە ستانسيا قىزمەتكەرلەرىنىڭ جالاقىسىنىڭ دەڭگەيىن ءتيىستى وڭىرلەر بويىنشا ورتاشا دەڭگەيگە دەيىن ارتتىرۋ بويىنشا جۇمىس جۇرگىزۋدە. شەكتى تاريف جوباسىندا وندىرىستىك پەرسونال جالاقىسىنىڭ ۇلعايۋى دا ەسكەرىلەدى. بۇل ەنەرگەتيكالىق كاسىپورىنداردان ەكونوميكانىڭ ارالاس سالالارىنا جوعارى بىلىكتى مامانداردىڭ كەتۋىن توقتاتۋعا باعىتتالعان.
ق ر ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ كوميتەتى ەنەرگيا ءوندىرۋشى ۇيىمداردىڭ شەكتى تاريفتەرىن ارتتىرۋدىڭ حالىقتىڭ الەۋمەتتىك ءال-اۋقاتىنا اسەرىنە تالداۋ جۇرگىزىپ جاتقانىن اتاپ ءوتتى.
ايتا كەتەيىك، ەلەكتر ەنەرگياسى ءتاريفى وتكەن جىلى دا 1 شىلدەدەن باستاپ قىمباتتاعان ەدى.