مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقباي پرەزيدەنتتىك جاستار كادر رەزەرۆىنە كەزەكتى ىرىكتەۋدىڭ ەرەكشەلىكتەرى مەن كەزەڭدەرى تۋرالى ايتتى، دەپ حابارلايدى aqshamnews.kz
اگەنتتىك ءتوراعاسى، پرەزيدەنتتىك جاستار كادر رەزەرۆى – دارىندى، باستاماشىل، كاسىبي بىلىكتى جاستاردى مەملەكەتتىك باسقارۋ جۇيەسىنە تارتۋعا باعىتتالعان ماڭىزدى جوبا ەكەندىگىنە نازار اۋداردى. مەملەكەت باسشىسى پرەزيدەنتتىك جاستار كادر رەزەرۆىنىڭ فورۋمىندا اتاپ وتكەندەي، «ەلىمىزدەگى بيزنەس، اۋىل شارۋاشىلىعى، قارجى، مەديسينا، ءبىلىم جانە باسقا دا سەكتورلاردا تابىستى ەڭبەك ەتىپ جۇرگەن ادامدار جەتكىلىكتى. ناقتى ناتيجەگە ۇمتىلىپ، تۇتىنۋشىنىڭ قاجەتتىلىگىن وتەۋ ءۇشىن جۇمىس ىستەيتىن وسىنداي مامانداردىڭ الەۋەتىن جۇمىلدىرۋ كەرەك».
بۇعان دەيىن 2019، 2021 جانە 2023 جىلدارى وتكەن ىرىكتەۋلەرگە قاتىسۋعا جالپى 60 مىڭنان استام قازاقستاندىقتار قىزىعۋشىلىق تانىتتى. ىرىكتەۋلەر قورىتىندىسى بويىنشا رەزەرۆكە 400 ادام قابىلداندى. بۇگىندە ولاردىڭ 318ء-ى جاۋاپتى قىزمەتتەرگە تاعايىندالىپ، ەكونوميكانىڭ ءتۇرلى سالالارىندا ەلىمىزدىڭ دامۋىنا ءوز ۇلەستەرىن قوسۋدا.
اتاپ ايتقاندا، 167 - ورتالىق مەملەكەتتىك ورگانداردا، 37 -جەرگىلىكتى اتقارۋشى ورگانداردا، 62 - ۇلتتىق كومپانيالاردا، 52 - وزگە ۇيىمداردا قىزمەت اتقارۋدا. سونداي-اق 39 رەزەرۆشى ساياسي لاۋازىمداردا، 3 - «ا» كورپۋسىنىڭ لاۋازىمدارىندا، 2 - ءماجىلىس دەپۋتاتى، 1 - ءماسليحات دەپۋتاتى بولىپ قىزمەت ەتۋدە.
دارحان جازىقبايدىڭ ايتۋىنشا، بيىلعى ىرىكتەۋدىڭ باستى ەرەكشەلىگى – ءار باعىت بويىنشا كانديداتتاردىڭ بىركەلكى سانىن قامتاماسىز ەتۋ ماقساتىندا ءاربىر كەزەڭدە پروپورسيونالدى ىرىكتەۋ وتكىزۋ. رەزەرۆتىڭ ءار سالالىق باعىتى بويىنشا كۆوتالار قاراستىرىلىپ، ىرىكتەۋ سول سالالىق باعىت بويىنشا عانا جۇرگىزىلەتىن بولادى. بۇل ءادىس سالالار اراسىنداعى تەڭگەرىمدى قامتاماسىز ەتىپ، ناقتى باعىتتار بويىنشا ۇمىتكەرلەردى ىرىكتەۋدى قامتاماسىز ەتەدى.
ىرىكتەۋ مەملەكەتتىك اپپاراتتىڭ سالالىق كادرلارعا قاجەتتىلىگىن ەسكەرە وتىرىپ، ينفراقۇرىلىم، ونەركاسىپ جانە ساۋدا ساياساتى، اگروونەركاسىپتىك كەشەن جانە قورشاعان ورتا، سىرتقى ساياسات جانە ينۆەستيسيالار؛ ەكونوميكالىق جانە قارجىلىق ساياسات، سيفرلاندىرۋ، الەۋمەتتىك ساياسات جانە ازاماتتىق قوعام سىندى 6 نەگىزگى سالا بويىنشا جۇرگىزىلەدى. كانديدات تىركەلۋ كەزىندە كورسەتىلگەن سالالىق باعىتتاردىڭ ءبىرىن تاڭداۋى قاجەت.
ۇمىتكەرلەرگە قويىلاتىن تالاپتار وزگەرىسسىز قالادى: ىرىكتەۋگە جاسى 35-تەن اسپاعان، جوعارى ءبىلىمى جانە 5 جىل جالپى جۇمىس تاجىريبەسى بار، مەملەكەتتىك ءتىلدى ۆ1 دەڭگەيىنەن تومەن ەمەس مەڭگەرگەن قازاقستان رەسپۋبليكاسىنىڭ ازاماتى قاتىسا الادى.
پرەزيدەنتتىك جاستار كادر رەزەرۆىنىڭ مۇشەسى بولۋ ءۇشىن ۇمىتكەرلەر 6 كەزەڭنەن تۇراتىن كەشەندى ىرىكتەۋدەن ءوتۋى ءتيىس.
قۇجاتتاردى قابىلداۋ – 1-30 ماۋسىم ارالىعىندا pkrezerv.gov.kz رەسمي پلاتفورماسىندا ونلاين رەجيمدە جۇزەگە اسىرىلادى. ىرىكتەۋدىڭ وبەكتيۆتىلىگىن قامتاماسىز ەتۋ ءۇشىن كانديداتتاردىڭ دەرەكتەرى جەكە ءنومىر بەرۋ ارقىلى جاسىرىلادى. باعالاۋشىلار ءۇشىن ۇمىتكەردىڭ كىم ەكەندىگى بەيمالىم بولادى.
ماتىندىك جانە ساندىق اقپاراتپەن جۇمىس ىستەۋ قابىلەتىن باعالاۋ – تەستىلەۋ پروكتورينگ جۇيەسىمەن، اۋديو جانە بەينەفيكساسيامەن وتەدى، ادىلدىك پەن اشىقتىق قامتاماسىز ەتىلەدى. تالاپتارعا سايكەس كەلەتىن بارلىق كانديداتتار ماتىندىك اقپاراتپەن جۇمىس ىستەۋ قابىلەتىن باعالاۋدان وتەدى. بۇل رەتتە ساندىق تەستىلەۋگە ءار سالالىق باعىت بويىنشا ەڭ كوپ بالل جيناعان كانديداتتاردىڭ 50%-ى جىبەرىلەدى.
سيتۋاسيالىق تاپسىرمالاردى شەشۋ كەزەڭى – كانديداتتاردىڭ تاڭداعان سالالىق باعىتتارىنا بايلانىستى ناقتى پروبلەمالاردى شەشۋ بويىنشا ۇسىنىستارىن باعالاۋعا باعىتتالعان. بۇل كەزەڭ ونلاين-رەجيمدە ەسسە جازۋ فورماتىندا وتەدى.
اسسەسسمەنت-ورتالىعى مەن قۇزىرەتتەر بويىنشا سۇحبات – وفلاين فورماتتا، پرەزيدەنت جانىنداعى مەملەكەتتىك باسقارۋ اكادەمياسىندا وتەتىن بۇل كەزەڭدە ۇمىتكەرلەر مىنەز-قۇلىق ينديكاتورلارى جانە كاسىبي قۇزىرەتتەر بويىنشا توپتىق جانە جەكە تاپسىرمالاردان وتەدى. ونلاين فورماتتاعى جەكە سۇحبات كاسىبي HR-مەنەدجەرلەرمەن وتكىزىلەدى.
ساراپشىلىق كوميسسيامەن اڭگىمەلەسۋ – ارنايى كوميسسيامەن سۇحباتتاسۋ تۇرىندە جۇزەگە اسىرىلادى. ونىڭ قورىتىندىسى بويىنشا ۇلتتىق كوميسسيا وتىرىسىنا 100-دەن اسپايتىن كانديداتتار ءتىزىمى ۇسىنىلادى.
ۇلتتىق كوميسسيانىڭ وتىرىسىنىڭ قورىتىندىسىمەن ۇزدىك 50 كانديدات پرەزيدەنتتىك جاستار كادر رەزەرۆىنە قابىلدانادى.
ىرىكتەۋدىڭ اشىقتىعى مەن ادىلدىگىن قامتاماسىز ەتۋ ماقساتىندا كانديداتتاردى باعالاۋ ناتيجەلەرى ولاردىڭ جەكە كابينەتىندە جانە كەزەڭ قورىتىندىسى بويىنشا اقپارات رەسمي سايتتا جاريالانادى.
اگەنتتىك ءتوراعاسى ەل مۇددەسىنە قىزمەت ەتەمىن دەگەن بەلسەندى جاس ازاماتتاردى پرەزيدەنتتىك جاستار كادر رەزەرۆىنە قاتىسۋعا شاقىردى.
«ءبىلىمدى، ەڭبەكقور، وتانعا قىزمەت ەتۋدى پارىز سانايتىن جاستار – ەلىمىزدىڭ تۇراقتى دامۋىنىڭ باستى قوزعاۋشى كۇشى. جاستاردىڭ ءبىلىمىن، الەۋەتى مەن كۇش-جىگەرىن ەل يگىلىگى ءۇشىن ءتيىمدى پايدالانۋ، قوعامدىق مۇددەلەرگە نەگىزدەلگەن كاسىبي مەملەكەتتىك قىزمەتشىلەردىڭ جاڭا بۋىنىن قالىپتاستىرۋ – اگەنتتىك جۇمىسىنىڭ باستى باعىتتارىنىڭ ءبىرى»، - دەدى دارحان جازىقباي.