بۇل تەڭىزدە، اۋەدە جانە شالعاي ايماقتاردا بايلانىس ءۇشىن قولدانىلاتىن Inmarsat سپۋتنيكتىك بايلانىسىنا تيەسىلى كود.
مەملەكەتتىك تەحنيكالىق قىزمەت (متق) قازاقستاندىقتارعا +870 كودىنان باستالاتىن نومىرلەردەن تۇسەتىن قوڭىراۋلارعا بايلانىستى ۇندەۋ جاسادى، - دەپ حابارلايدى aqshamnews.kz
متق مالىمەتىنشە، +870 تەلەفون كودى تەڭىزدە، اۋەدە جانە شالعاي ايماقتاردا بايلانىس ءۇشىن قولدانىلاتىن Inmarsat سپۋتنيكتىك بايلانىسىنا تيەسىلى.
“دەگەنمەن، الاياقتار مۇنداي نومىرلەردى الداۋ ماقساتىندا بەلسەندى پايدالانادى، سەبەبى ولار قازاقستاندىق نومىرلەرگە ۇقساس”، – دەلىنگەن حابارلامادا.
سونداي-اق، الاياقتار Inmarsat-تىڭ باسقا دا ۇقساس كودتارىن قولدانۋى مۇمكىن:
+870 – جەلىگە جالپى كىرۋ كودى (SNAC)؛
+871 – اتلانت مۇحيتى، شىعىس بولىگى (AOR-E)؛
+872 – تىنىق مۇحيتى ايماعى (POR)؛
+873 – ءۇندى مۇحيتى (IOR)؛
+874 – اتلانت مۇحيتى، باتىس بولىگى (AOR-W).
ايتا كەتەيىك، +870 تەلەفون كودى جالپى قولدانىستاعى كود بولىپ تابىلادى جانە قوڭىراۋلاردىڭ قاي سپۋتنيك ارقىلى جاسالىپ جاتقانى بەلگىسىز بولعان كەزدە قولدانىلادى. الايدا SNAC Inmarsat-A تەرمينالدارىنا قوڭىراۋ شالۋدى قولدامايدى.
“بەلگىسىز +870 جانە باسقا دا وسىنداي كودتارى بار نومىرلەرگە قايتا قوڭىراۋ شالماڭىز! جەكە دەرەكتەرىڭىزدى، SMS كودتارىن جانە بانك كارتالارىڭىزدىڭ مالىمەتتەرىن ەشكىمگە حابارلاماڭىز. ەگەر سىزدەن وسىنداي نومىرلەر ارقىلى كود نەمەسە باسقا دا اقپارات سۇرالسا، بۇل – الاياقتىقتىڭ انىق بەلگىسى. ەشقاشان جەكە اقپاراتىڭىزدى بەرمەڭىز”، – دەپ ەسكەرتتى متق.