Almaty-akshamy.kz سايتىندا بۇگىن جارىق كورگەن جاڭالىقتارعا شولۋ – كۇن كەرۋەنى
قازاقستانعا + 18 قالا؟
ەلىمىزدە جاڭادان قالا قاتارىنا قوسىلۋى مۇمكىن اۋىلدار اتالدى. قالاعا اينالۋى مۇمكىن ەلدىمەكەندەردىڭ قاتارىندا الماتى، جامبىل، ماڭعىستاۋ، قىزىلوردا جانە تۇركىستان وبلىستارىنداعى اۋىلدار بار.
ۇلتتىق ەكونوميكا ءمينيسترى نۇرلان بايبازاروۆتىڭ سوزىنشە، ەلىمىزدە 10 مىڭنان استام تۇرعىنى بار 112 اۋىل بار. ونىڭ ىشىندە 18 ەلدى مەكەندە 30 مىڭنان استام ادام تۇرادى. زاڭ بويىنشا ولارعا قالا مارتەبەسى بەرىلۋى ءتيىس.
اسسامبلەيانىڭ ءحححىىى سەسسياسى وتەدى
پرەزيدەنت قاسىم-جومارت توقايەۆ «بىرلىك. جاسامپازدىق. ورلەۋ» اتتى تاقىرىپتا وتەتىن قازاقستان حالقى اسسامبلەياسىنىڭ كەزەكتى ءحححىىى سەسسياسىن شاقىرۋ تۋرالى جارلىققا قول قويدى. جيىن 2024 جىلى 24-25 ءساۋىر كۇندەرى استانا قالاسىنداعى پرەزيدەنتتىك ورتالىقتا وتەدى.
جەر كۇنى
20 ناۋرىز بۇۇ باستاماسىمەن بۇكىل الەمدە جەر كۇنءى (Earth Day) دەپ اتاپ وتىلەدى. سونىمەن قاتار، حالىقارالىق مەرەكەلەر كۇنتىزبەسىندە جەرگە ارنالعان ەكى اتاۋلى كۇن بار – بۇگىنگى كۇن كوكتەمگى كۇن مەن ءتۇننىڭ تەڭەلۋىنە سايكەس كەلسە، ال ەكىنشىسى - 22 ءساۋىر. ءبىرىنشىسى بىتىمگەرشىلىك جانە گۋمانيستىك باعىتقا يە، ەكىنشىسى ەكولوگيالىق سيپاتقا يە.
قارىزى بارلار لوتەرەيا ويناي المايدى
ءماجىلىس ويىن بيزنەسى، لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى مەن وعان ىلەسپە تۇزەتۋلەردى جۇمىسقا الدى. زاڭ جوباسى مەملەكەت باسشىسىنىڭ قۇمار ويىندارعا شەكتەۋ قويۋ تاپسىرماسىنىڭ شەڭبەرىندە پارلامەنت دەپۋتاتتارىنىڭ باستاماسىمەن ازىرلەندى.
باقىتتىڭ دا كۇنى بار...
2012 جىلى بۇۇ ءوزىنىڭ 66/281 قارارىمەن 20 ناۋرىزدى حالىقارالىق باقىت كۇنى (International Day of Happiness) دەپ جاريالادى.ول ءار ادامنىڭ ومىرىندەگى باقىتتىڭ ماڭىزدىلىعىن مويىنداۋ جانە باقىتقا ۇمتىلۋ ءبىزدىڭ پلانەتامىزداعى بارلىق ادامدار ءۇشىن ورتاق سەزىم دەگەن يدەيانى قولداۋ ماقساتىندا پايدا بولعان.
الماتى اسپانىن كەرنەگەن «كۇي كۇمبىرى»
بۇگىن، 20 ناۋرىز ەلىمىزدە رەسپۋبليكالىق «كۇي كۇمبىرى» اتتى چەللەندجى ءوتىپ جاتىر. الماتى قالاسىنىڭ بارلىق ءبىلىم بەرۋ ۇيىمدارىندا ءبىر ۋاقىتتا رۋھتى كۇيلەر ورىندالدى. الماتىداعى №161 ليسەي، №12 مەكتەپ-گيمنازيا، №137 جانە رەسپۋبليكالىق فيزيكا-ماتەماتيكا مەكتەبى قاتارلى ءبىلىم بەرۋ مەكەمەلەرىندە «كۇي كۇمبىرى» اتتى چەللەندجى ءبىر ۋاقىتتا، تۇسكى ساعات 12:00-دە باستالدى. رەسپۋبليكالىق چەللەندجىنى مەكتەپ وقۋشىلارىنان قۇرالعان دومبىرا وركەسترلەرى وتكىزۋدە. ولار قۇرمانعازىنىڭ «سارىارقا»، «بالبىراۋىن»، «اداي» قاتارلى توكپە كۇيلەرىن ءبىر ۋاقىتتا ورىندادى.
قارجى پيراميدالارىنىڭ 182 چاتى بۇعاتتالدى
قارجىلىق مونيتورينگ اگەنتتىگىنىڭ ءتوراعاسى دميتريي مالاحوۆتىڭ تاپسىرماسى بويىنشا «قارجى پيراميدالارىنا قارسى ءىس-قيمىل» ارنايى جوباسى ىسكە قوسىلدى. تەك سوڭعى التى ايدا ينتەرنەت جەلىسىندە 36 قارجى پيراميداسى انىقتالدى. ولار بويىنشا «WhatsApp»، «Telegram» جانە «Instagram» الەۋمەتتىك جەلىلەرىندە 200 چات انىقتالعان. بۇگىنگى تاڭدا 182 چات بۇعاتتالدى.