15 jeltoqsannan bastap polıseıler respýblıka aýmaǵynda zańsyz aǵash kesýdi anyqtaý jáne jolyn kesý sharalaryn bastady. Bul týraly QR İshki ister mınıstrliginiń ókili Shuǵyla Turlybek aıtty, dep habarlaıdy almaty-akshamy.kz QazAqparatqa silteme jasap.
Baqylaýdy kúsheıtý maqsatynda avtojoldarda, sondaı-aq bazarlarda jáne basqa jerlerde 300-den astam mobıldi top qurylǵan.
«Jańajyldyq merekeler qarsańynda polıseıler tabıǵatty qorǵaý zańnamasynyń saqtalýyn baqylaýdy kúsheıtti. Eldi mekenderde qylqan japyraqty aǵashtardyń satylýyn baqylaý, olardy belgilenbegen jerde satýǵa tyıym salý, sondaı-aq tıisti qujattarǵa tekserý júrgiziledi», - dedi İshki ister mınıstrliginiń ókili aptalyq onlaın brıfıńide.
Onyń aıtýynsha, qylqan japyraqty aǵashty satýǵa ruqsat bolmasa, satýshy jasyl jelekti kútip ustaý jáne qorǵaý erejelerin buzǵany úshin ákimshilik jaýapkershilikke tartylýy múmkin.
Osy bap boıynsha: jeke tulǵalarǵa 15 AEK mólsherinde, shaǵyn kásipkerlik sýbektilerine nemese komersıalyq emes uıymdarǵa 30 AEK, orta kásipkerlik sýbektilerine 50 AEK, iri kásipkerlik sýbektilerine 150 AEK mólsherinde aıyppul salynady nemese eskertýler jasalady.
«Orman kóshetterin zańsyz kesý anyqtalǵanda, QR Qylmystyq kodeksinde bas bostandyǵynan aıyrý túrindegi eń joǵary jaza kózdeledi. Atalǵan aldyn alý sharasy jańajyldyq merekelerge deıin jalǵasady», - deıdi Sh. Turlybek.