Elimizdiń barlyq óńirlerinde «Quqyqtyq tártip» jedel aldyn alý sharasy ótip jatyr.
Qańtar oqıǵalarynan keıingi atalmysh sharada zańsyz qarý ustaǵan 189 adam ustaldy, dep habarlaıdy Almaty-akshamy.kz QazAqparatqa silteme jasap.
«Qarý men oq-dárilerdi zańsyz saqtaǵany úshin jáne alyp júrgeni úshin 189 adam ustaldy, 252 dana atys qarýy, 2 315 arnaıy quraldar men oq-dáriler tabyldy jáne tárkilendi. Mysaly, Almatyda «Shańyraq-2« shaǵynaýdanynda turǵylyqty jerinen ańshylyq myltyq, 8 pnevmatıkalyq myltyq, pnevmatıkalyq tapansha, snarád, 12 granat, Kalashnıkov avtomatynyń 2 magazıni, saýyt jáne qalqan tabylyp, tárkilengen tórt azamat ustaldy. Taraz qalasynda bir top adam ustaldy, olardan 2 travmatıkalyq jáne 1 sıgnaldyq tapansha, jaryq-shý granatasy jáne 9 mm kalıbrli 173 patron tabylyp, tárkilendi», - dedi QR İİM Ákimshilik polısıa komıteti basqarmasynyń bastyǵy Baǵlanbek Aıtpaev mınıstrlikte ótken brıfıńte.
Sonymen birge, spıkerdiń aıtýynsha, Taldyqorǵanda turǵylyqty jerinen 9 patrony bar «Makarov» tapanshasy tabylyp, tárkilengen adam ustaldy. Jambyl oblysynda travmatıkalyq tapansha, ańshylyq myltyq jáne saýyt tárkilengen eki adam ustaldy.
«Turǵyndardyń óz erkimen 50 qarý, onyń ishinde 5 ıir oıyqty, 29 tegis uńǵyly jáne ózge de 4 qarý tapsyryldy», - dedi basqarma bastyǵy.
Buǵan deıin QR İshki ister mınıstrligi 19 qańtarda tótenshe jaǵdaı rejımi joıylǵan soń, elimizdiń barlyq óńirlerinde «Quqyqtyq tártip» jedel aldyn alý sharasy ótetinin jarıalaǵan edi. Atalǵan shara aıasynda 4 myńnan astam qylmys ashyldy.