Jarylys bolǵan aýmaqta jedel-tergeý toby jumysty aıaqtady
Jaıaý júrginshilerge arnalǵan Istıklál kóshesinde bolǵan jarylys saldarynan 6 adam qaza taýyp, 81 adam jaraqat aldy. Tótenshe oqıǵa ornyna jetken polısıa jasaqtary kóshede qaýipsizdik sharalaryn qabyldady, dep habarlaıdy Almaty-akshamy.kz QazAqparatqa silteme jasap.
Polısıa zardap shekkenderdiń keıbiri jetkizilgen Taksım zertteý jáne oqý aýrýhanasy mańynda qaýipsizdikti kúsheıtti.
Anadolu agenttiginiń málimetinshe, jarylys bolǵan aýmaqta jedel-tergeý toby jumysty aıaqtady. Polısıa Istıklál kóshesi men Taksım alańyn kólik pen jaıaý júrginshiler úshin japty. Taksım Djýmhýrıet kóshesindegi Sıslı-Tarlabashı baǵytyndaǵy jerasty ótkeli men Taksım baǵytyndaǵy Ýnkapanı (Atatúrik) kópiri de kólik qozǵalysy úshin ýaqytsha jabyldy.
Indonezıaǵa saparynyń aldynda jınalys ótkizgen prezıdent Erdoǵan: «Múmkin bul terorızm dep aıtqan durys emes shyǵar, biraq gýbernatordyń bergen oqıǵa týraly alǵashqy aqparattary kúdigimizdi rastaı túsedi», - dedi.
«Qazirgi ýaqytta shabýyldy áıel jasady degen boljam bar», - dedi Túrkıa prezıdenti.
Al vıse-prezıdent Fýat Oktaıdyń aıtýynsha, osy ýaqytqa deıin 6 adam qaza tapty, onyń 4-eýi oqıǵa ornynda qaza tapsa, 81-i jaraqat aldy. Olardyń ekeýi - aýyr halde.
Oktaı prezıdent Erdoǵannyń sózin qýattap: «Biz ázirge jarylysty áıel jasady degen oıdamyz jáne terrorlyq áreket dep esepteımiz», - dedi.
QazAqparattyń Ystambuldaǵy menshikti tilshisiniń habarlaýynsha, jarylys jergilikti ýaqyt boıynsha 16:30-da Taksımdegi Istıqlál kóshesinde bolǵan. Bul - túngi klýbtar men meıramhanalar bar, adam nópiri kóp saýda aımaǵy. Ol «Respýblıka» monýmenti oryn tepken alańnyń aınalasynda ornalasqan. Munda jergilikti turǵyndar men sheteldik týrıser jıi taban tireıdi.
Istıkláldyń basty jaıaý júrginshiler bóliginde 19-ǵasyrdaǵy áıgili brendterdiń kınoteatrlary, kafeleri men dúkenderi ornalasqan. Munda eski qyzyl tramvaılar da júredi.