Jınaqpen Almaty qalasynyń barlyq qazaq jáne aralas mektepteri qamtamasyz etilgen
2023 jyldyń 27 qańtarynda Abaı ýnıversıtetinde «Urpaq tárbıesindegi qundylyqtar negizi» jınaǵynyń tusaýkeseri ótti, dep habarlaıdy Almaty-akshamy.kz.
İs-sharaǵa QR Parlamenti Májilisiniń depýtaty Juldyz Súleımenova, Abaı ýnıversıtetiniń rektory Darhan Bilálov, akademık, Qazaqstan Pedagogıkalyq ǵylymdar akademıasynyń prezıdenti Asqarbek Qusaıynov, Qazaqstannyń Tuńǵysh Eńbek Eri, qaıratker ustaz, Qazaqstan PǴA akademıgi Aıagúl Mırazova, Almaty qalasy №81 mektep-gımnazıa dırektory Nurǵalı Týrýmbetov, Almaty qalasy bilim basqarmasy men pedagogıkalyq baǵyttaǵy joǵary oqý oryndary men orta bilim berý mekemeleriniń ókilderi qatysty.
Tusaýkeserdi Abaı atyndaǵy QazUPÝ rektory Darhan Bilálov ashyp, atalǵan jınaqtyń elimizdiń óskeleń urpaǵyna bilim men tárbıe berýdegi mańyzdylyǵyna qysqasha toqtaldy. Bul másele kez kelgen qoǵam úshin asa ózekti ekendigi atap ótildi.
Urpaq tárbıesin jetildirý maqsatynda Pedagogıkalyq ǵylymdar akademıasy Abaı ýnıversıteti jáne Almaty qalasy bilim basqarmasymen birlese otyryp, mektep oqýshylaryna tárbıe berý jumystaryn jetildirý jobasyn jasady. Bul joba QR Oqý-aǵartý mınıstrliginiń Orta bilim berý komıtetiniń qoldaýyna ıe bolyp, jastar tárbıesiniń 6 ózekti baǵyty anyqtalyp, olar boıynsha tıimdi jumys jasaý úshin 14 ádistemelik nusqaýlyq ázirlendi. Barlyq nusqaýlyqtar toptastyrylyp, «Urpaq tárbıesiniń qundylyqtar negizi» taqyrybynda 3 bólimnen turatyn jınaq daıyndaldy.
Osy jobanyń ǵylymı jetekshisi akademık Asqarbek Qusaıynov, Aıagúl Mırazova, Juldyz Súleımenova, №2 gýmanıtarlyq-pedagogıkalyq kolej jáne №81 mektep-gımnazıa basshylary sóz sóıledi. Olar 1-synyptan bastap 11-synypqa deıin oqýshylarǵa, sabaqtan tys ýaqytta, tárbıe jumystaryn júrgizýdiń birtutas ǵylymı-praktıkalyq negizi jasalǵanyn jáne Y.Altynsarın atyndaǵy Ulttyq bilim akademıasy bul jınaqty orta bilim berý uıymdarynyń pedagogteri tárbıe jumystarynda qosymsha ádistemelik nusqaýlyq retinde qoldanýyna usynylǵanyn aıtty. Jınaqpen Almaty qalasynyń barlyq qazaq jáne aralas mektepteri qamtamasyz etilgen.
