Qondyrǵy energıa tapshylyǵy máselesin sheshýge kómektesedi
Petropavldyq mektep oqýshylary elektr jáne jylý energıasyn óndiretin robot qurastyrdy. Jas ónertapqyshtardyń aıtýynsha, qondyrǵy energıa tapshylyǵy máselesin sheshýge kómektesedi, dep habarlaıdy Almaty-akshamy.kz Azattyq Ruhy-na silteme jasap.
Petropavl qalasyndaǵy Nazarbaev Zıatkerlik mektebiniń oqýshylary robototehnıka boıynsha NURORDA first Championship jarysyna qatysty. Oqýshylar aımaqtyq komandalar arasynda "Engineering skills" nomınasıasy boıynsha marapatqa ıe boldy.
«Biz óz jobamyzdy "Oblysymyzdaǵy elektr energıasynyń tapshylyǵyn sheshý» dep atadyq. Bul taqyryp qazir, ásirese, jergilikti JEO-daǵy problemalarǵa baılanysty ózekti. Biz óz jobamyzǵa saı robot jasadyq. Bizdiń stansıa qumdy batareıalardyń arqasynda jel energıasyn jylý energıasyna aınaldyrady. Osylaısha, turǵyndar jylýmen qamtamasyz etiledi», - deıdi «ArtaRobotics» komandasynyń jetekshisi Taımas Edrısov.
First LEGO League Challenge elordalyq NURORDA mektebi uıymdastyrǵan. Robototehnıka boıynsha halyqaralyq chempıonat oqýshylardyń zıatkerlik-shyǵarmashylyq jáne ınjenerlik-tehnıkalyq áleýetin ashady, sıfrlyq tehnologıalardy qoldaný arqyly qoıylǵan maqsattar men mindetterdi sheshýde kreatıvti oılaýdy qalyptastyrady. QR aýmaǵynda FIRST baǵdarlamasy 2017 jyly bastaý alǵan bolatyn.
«Onda 10-16 jas aralyǵyndaǵy stýdentter zertteý, problemalardy sheshý, kodtaý jáne dızaınmen aınalysady. Osylaısha, olar Robot oıynynda belgili bir mısıany oryndaıtyn robot jasap, onyń baǵdarlamalamasyn ázirleıdi, sondaı-aq naqty máseleni anyqtaý jáne sheshý úshin ınovasıalyq jobaǵa qatysady. Challenge baǵdarlamasynyń maqsaty — oqýshylarǵa ınklúzıvti, ádil jáne qaýipsiz qoǵamdy damytý úshin neǵurlym turaqty tehnologıalardy qurýda praktıkalyq bilim men tájirıbeni qoldanýǵa úıretý. Robottardy jobalaý jáne baǵdarlamalaý salasyndaǵy daryndy oqýshylardy biriktiretin chempıonatta bizdiń oqýshylarymyzǵa Qaraǵandy, Ulytaý, Aqmola, Qostanaı, Pavlodar oblystarynyń myqty komandalary men elordalyq konstrýktorlar básekeles boldy. Petropavldyq Nazarbaev Zıatkerlik mektebiniń robot qurastyrýshylary bul saıysta «Engineering skills» nomınasıasyna ıe boldy», - deıdi zıatkerlik mekteptiń baspasóz hatshysy Gúlmıra Shoqtybaeva.
Oqýshylar marapattan basqa, qundy tájirıbe men jarqyn áser alyp, jańa dostar men pikirles jandar tapqanyn atap ótti.