Baspasóz qyzmetiniń málimetterine qaraǵanda, 5 aıǵa sozylǵan konkýrsqa qatysý úshin 400-den astam ótinim tústi. Syılyq «Astana opera» teatrynyń Úlken sahnasynda «Oskar» formatynda tabystaldy.
UMAI syılyǵynyń saltanatty rásimin Mádenıet jáne sport mınıstri Dáýren Abaev ashyp, baıqaýdyń barlyq qatysýshysyn quttyqtap, óner salasynyń ókilderine úlken shyǵarmashylyq jolda jańa jetistikter tiledi. Jalpy, 19 laýreat UMAI músinshesi men aqshalaı syılyqtarǵa ıe boldy.
«Elimizde tuńǵysh taǵaıyndalyp otyrǵan UMAI ulttyq syılyǵynyń jeńimpazdaryn, óner salasyndaǵy jyl úzdikterin anyqtaýǵa arnaıy jınalyp otyrmyz. «Umaı» ulttyq syılyǵy – sahna arqyly sanaǵa tóńkeris jasaıtyn, júrekterden izgilik izdeıtin naǵyz óner maıtalmandaryna arnalǵan. Ózderińiz bilesizder, kez kelgen adam kúndelikti kúıbeńnen ózin tek teatr, bı, sýret, mýzyka, ádebıet arqyly ǵana qutqarady. Sondyqtan, bul premıanyń mańyzy biz oılaǵannan áldeqaıda tereńde dep sanaımyn. Barsha jeńimpazdardy shyn júrekten quttyqtaımyn!», - dedi Dáýren Abaev.
Aıta keteıik, jeńimpazdardy komısıa músheleri anyqtady. Barynsha ádil tórelik jasaý maqsatynda qazylar alqasynyń esimderi sońǵy sátke deıin qupıa bolyp qaldy.
Sonymen, syılyqtyń laýreattary:
«Teatr óneri» nomınasıasy boıynsha:
«Opera óneri» – erler partıasynyń úzdik oryndaýshysy – «Astana Opera» jetekshi solısi Medet Shotabaev (Kavaradossı partıasy, «Toska», Dj. Pýchchını). Áıelder partıasynyń úzdik oryndaýshysy – «Astana Opera» jetekshi solısi Jupar Ǵabdýllına (Aıda partıasy, «Aıda», Dj. Verdı);
«Akterlik sheberlik» – Úzdik er adam róli úshin syılyqty Ǵalymbek Ospanov aldy (Genrı Hıggınstiń róli, B.Shoýdyń «Meniń súıikti perishtem» pesasy boıynsha, rejıseri – A.Orazbekov, Muhtar Áýezov atyndaǵy Qazaq Ulttyq akademıalyq drama teatry). Úzdik áıel róli úshin syılyqty Olga Korjeva aldy (Marına Svetaevanyń róli, «ARS Amandi. Mahabbat óneri». Rejıseri - G. Efımova, N. Sas atyndaǵy balalar men jasóspirimderge arnalǵan memlekettik akademıalyq orys teatry);
«Úzdik rejıssýra» – V.Shekspırdiń «Koról Lır» qoıylymy úshin Farhat Moldaǵalı. Ǵ. Músirepov atyndaǵy balalar men jasóspirimderge arnalǵan Qazaq memlekettik akademıalyq teatry;
«Spektákldiń úzdik kórkemdik bezendirilýi» - Sofá Tasmaǵambetova, Pavel Dragýnov. E. Rahmadıevtiń «Alpamys» operasy, «Astana Opera»memlekettik opera jáne balet teatry;
«Úzdik mýzykalyq-dramalyq spektákl» - «Bórte» D. Isabekov. Túrkistan mýzykalyq-drama teatry.
Bes syılyq «Horeografıa óneri» nomınasıasynda anyqtaldy:
«Úzdik bı ujymy» - «Aqqý» bı ansambli. Jetekshisi-Gúlnara Mambetova. «Ene tárbıesi» bıi. Ǵazıza Jubanova atyndaǵy Aqtóbe oblystyq fılarmonıasy;
Balettegi Úzdik oryndaýshy» – Úzdik solıs-Aınur Ábilǵazına, «Astana Balet» teatry. Úzdik solıs-Azamat Asqarov. Abaı atyndaǵy Qazaq Ulttyq akademıalyq opera jáne balet teatry;
«Úzdik horeograf» - Muqaram Ábýbahrıeva, «Sultan Beıbarys» baleti. «Astana Balet» teatry.
«Úzdik balet qoıylymy» - «Dala qońyraýy». 2 bólimnen turatyn balet, kompozıtorlar-Q. Shildebaev, R.Gaısın, T. Mombekov, K. Pıno-Kıntana. Kórkemdik jetekshisi - Altynaı Asylmuratova, «Astana Opera» memlekettik opera jáne balet teatry.
«Mýzykaly-oryndaýshylyq óner» nomınasıasynyń jeńimpazdary úsh marapatqa ıe boldy:
«Úzdik dástúrli oryndaýshy» (án aıtý) – Dıas Murathan, «Alataý» dástúrli óner teatry (Almaty).
«Úzdik dástúrli oryndaýshy» (aspapshy) – Janǵalı Júzbaı, Qazaq ulttyq óner ýnıversıteti (Astana).
«Úzdik mýzykalyq ansámbl» – DUET CLASSIC Ermek Qurmanaev / Anara Kamelınova. Jambyl atyndaǵy Qazaq memlekettik fılarmonıasy (Almaty), Qazaq ulttyq óner ýnıversıteti (Astana).
«Beıneleý jáne sándik-qoldanbaly óner» nomınasıasynda úsh syılyq tabystaldy:
«Úzdik sándik-qoldanbaly óner týyndysy» úshin – Sáýle Bapanova. Kıizden jasalǵan koleksıa. Temirbek Júrgenov atyndaǵy Qazaq ulttyq óner akademıasy;
«Sýretshiniń / grafıktiń úzdik jumysy» -sýretshi Vácheslav Lú-Ko «Ýmaıdyń oralýy» (grafıka).
«Zamanaýı ónerdegi úzdik joba» úshin – Sáken Narynov. «Altyn júrek» jobasy. Qazaqstan Respýblıkasy Sáýletshiler Odaǵy.
«Úzdik balalar spektakli úshin» arnaıy júldesin jarıalaý úshin jeńimpazdardyń esimi jazylǵan konvertti sımvoldyq túrde Balalar jylynda balalar sahnaǵa alyp shyqty jáne ashty. Aıta keteıik, QR Mádenıet jáne sport mınıstri Dáýren Abaevtyń qolynan úlken marapatqa Qazaq ulttyq horeografıa akademıasy Rıkardo Drıgonyń «Raýshan búrshigi men kóbelektiń romany» baleti úshin jáne Mańǵystaý oblystyq qýyrshaq teatry «Aıjan ájesiniń ertegisi» (Aıjan ájesiniń ertegileri), «Qaıta jańǵyrǵan órnek» (oıý-órnekti jandandyrǵan), «Dastarhan» trılogıalary úshin jeńip aldy.
«Bıyl biz mádenıet jáne óner salasyndaǵy kóptegen jobalardy iske asyrdyq. Umai-dan basqa, Dala Dauysy shyǵarmashylyq baıqaýy, «Shertpe kúı» dástúrli mýzyka festıvali, Roza Baǵlanova atyndaǵy vokalıster baıqaýy, Astana Piano Passion jas pıanıser baıqaýy, «Altyn dombyra» respýblıkalyq aıtysy, «Eýrazıa» kınofestıvali, «Aıboz» ádebı syılyǵy jáne basqa da jobalar. Biz sózben aıtqanda ultymyzdyń at ústindegi aıbyndy rýhyn kótergen, qalamgerlerimizdiń, óner ókilderiniń shabyttaryna shamshyraq bolǵan júıeli jumystar bir jyl ishinde ǵana atqaryldy.
Mınıstrliktiń basqa da salalaryna, ıaǵnı sport pen týrızmge qatysty qolǵa alynǵan is-sharalary da jeterlik. Óz kezeginde, osy irgeli isterdi birlesip atqarǵan barlyq áripteske aıryqsha alǵys bildirgim keledi. Kelesi jyly mundaı jobalar odan da kóp bolady», - dep túıindedi Dáýren Abaev.
Aıta keteıik, úlken shoý-baǵdarlamaǵa desin teatr foıesine sýret jáne eskızder kórmesi qoıyldy, al óner maıtalmandary qyzyl kilem ústinen júrip ótti.