Onyń sebebin de túsindirdi.
Qazaqstannyń Ulttyq Bank Tóraǵasy Ǵalymjan Pirmatov qazirgi jaǵdaıda ınflásıanyń ósý úrdisin keri qaıtarý úshin bazalyq mólsherlemeni arttyrý qajettiligin aıtty, dep habarlaıdy Almaty-akshamy.kz.
Esterińizge sala ketsek, Qazaqstan Respýblıkasy Ulttyq Bankiniń Aqsha-kredıt saıasaty jónindegi komıteti osy jyldyń 25 sáýirinde bazalyq mólsherlemeni + / - 1,00 p. t. paıyzdyq dálizimen jyldyq 14% deńgeıinde belgileý týraly sheshim qabyldaǵan bolatyn.
Mamannyń aıtýynsha, bul rette bazalyq mólsherlemeniń deńgeıine qatysty sheshim teńdestirilgen jáne bul sheshim onyń ekonomıkalyq belsendilikke áserin eskere otyryp qabyldanady.
«Biz budan nesıeleýge jáne ekonomıkalyq ósýge aıtarlyqtaı qaýip tóndirmeıtinin kórip otyrmyz, biraq ınflásıany baqylaý úshin asa mańyzdy. Belgilengen bazalyq mólsherlemeniń deńgeıine qatysty aıtatyn bolsaq, qazirgi ýaqytta ońtaıly sheshim bolǵany sózsiz jáne búgingi qalyptasqan jaǵdaıǵa tolyqtaı sáıkes keledi. Jumsartylǵan aqsha-kredıt saıasaty bir mezettik kúmándi paıdaǵa keneltýi múmkin, biraq uzaq merzimdi perspektıvada onyń saldary qaıtarymsyz bolady», – dedi Ǵalymjan Pirmatov QUB-tyń baspasóz-brıfıngi kezinde.
Brıfıńte aıtylǵan málimetterge sáıkes, nesıelendirý kóleminiń ósýine qarap ekonomıkalyq belsendilikti baǵalaýǵa bolady. Máselen, birinshi toqsanda ekonomıkaǵa berilgen jańa kredıtterdiń kólemi ótken jyldyń osy kezeńimen salystyrǵanda 25,3%-ǵa ulǵaıdy, onyń ishinde bızneske – 19,6%, halyqqa – 32,5%.
«Degenmen, 2022 jyldyń naýryz aıynyń qorytyndysy kórsetkendeı, belgisizdik beleń alyp, nesıe berý sharttary ózgerip jatqan jaǵdaıda mólsherlemeniń kóterilgeni kredıtteý úshin tejeýshi faktor bolmaıdy», - dedi Ǵalymjan Pirmatov.
Bazalyq mólsherleme boıynsha qabyldanǵan bul sheshim teńgedegi aktıvterdiń tartymdylyǵyn arttyrady. Bul óz kezeginde halyqtyń raıyn tutynýshydan jınaqtaýǵa qaıta teńdestirýge múmkindik beredi.
«Sonymen qatar ınflásıalyq kútýlerdiń traektorıasyn, ınflásıa boıynsha jańartylǵan boljamdardy, jıyntyq suranys pen ımportty, sondaı-aq basqa da qosymsha ınflásıalyq shoktardyń paıda bolý táýekelin eskere otyryp, aqsha-kredıt sharttaryn odan ári kúsheıtý úshin de saqtalǵan keńistik bar», - dep túıindedi Ǵalymjan Pirmatov.
Qazaqstan Respýblıkasy Ulttyq Bankiniń Aqsha-kredıt saıasaty jónindegi komıtetiniń bazalyq mólsherleme boıynsha kezekti josparly sheshimi 2022 jyly 6 maýsymda Nur-Sultan ýaqyty boıynsha saǵat 15:00-de jarıalanady.